24th Classic Cup: Chedema Village Youth Organisation final-i iogo

Kohima, Yimpoksüi/Nov 17 (TYO): Classic Club Kohima puri ayongba 24buba Classic Cup semifinal asaya tanabuba nung Chedema Village Youth Organisation nungi asayar Imlong Chaba-i hat-trick agüja par telok final-i iogo.
Chedema VYO puro goal 5-1 agi Küluopfü Football Club Pochury madak takok angu.
Asaya nung Küluopfü FC puri minute pezübuba nung mezüngbuba goal idaktsür lila saka Jimühie-i goal line nung ball tongoktsüba Chedema defender Malder-i kanga junga nokdang aser counter attack asüba mapang nung Salu Khulim-i goal idaktsütsü atema goal keeper dang atentsü nüngdaka liasü saka pai metsüba ball tezüleni oadok. Asaya nung minute 10buba ano Shürhosül-i goal ka meyidaktsüteti liasü. Minute 15 orr aliba mapang nung Küluopfü defender Atho nem yellow card ka agüja liasü aser iba aibelen atema free kick metsütsü asoshi maongka agütsü, koba Salu-i metsü, saka ball cross bar nung ball ondaker adok.
Maneni minute 18buba nung Küluopfü forward Jimühie-i metsüba ball goal keeper Seyieneituo-i ayong ayonga apu aser paisa minute 24buba nung Dominic Ngouri-i metsüba ball kanga junga nokdanga liasü.
Ajisüaka minute 26buba nung Chedema VYO nungi asayar Imlong Chaba-i mezüngbuba goal idaktsü. Iba sülen Küluopfü puri goal idaktsütsü asoshi maongka ngua liasü saka Michael Nyuwi-i metsüba ball tezüleni oadok. Asaya nung tanabuba goal ya Punürü-i pass asüba ball ka Imlong Chaba-i tekolak agi tongoktsü.
Asaya tanabuba shilem nung Chedema VYO puri maneni asaya amokbanger asaya aser Punürü Nienu-i minute 55buba nung par telok asoshi goal tasembuba idaktsü aser Shürhosül-i minute 59buba nung goal 4buba idakja liasü.
Iba sülen minute orr Küluopfu FC Pochury forward Sienguji-i par telok asoshi goal ka idakja liasü aser kasa mapang nung Chaba-i minute 66buba nung pa asoshi goal tasembuba aser par telok asoshi goal 5buba idakja liasü.
Tanü asaya akokba sülen Chedema VYO pur Yimpoksüi/November 19 nü 1:30 nungi tenzüka Head Hunters Jakhama den final asayatsü.