Dimapur Police-i nisung tepsettsü meranger ana apu

Dimapur, Yimpoksüi/November 17 (TYO): Nisung tepsettsü merangba ken o dak sendakba nung Yimpoksüi/ November 14, 2018 nü Dimapur Police-i nisung ana puogo, ta tanü Addl. Dy. Commissioner of Police/PRO, Dimapur-i sangdong ka nung metetdaktsü.
Iba ken o nung arishi küm 35, Jitu Chaudhary (S/o Javid Chaudhary, Panikhaiti village Po/Ps. Chandrapur Dist. Kamrup, Assam, P/Add- Panikhaiti, Kamrup, Assam) aser arishi küm 37, Randip (S/o Sukhbir, Bahri village Po/Ps Asandh, Dist. Karnal, Haryana P/Add. H.No. 252, Bahri, Karnal, Haryana) na apu.
Tang pua alir ana jagi tamalen meteta aliba driver ka nem mozü chidaktsüba sülen kanga mejungi züker Chumukedima anasa National Highway 29 gari lenmang kübok ondaka yutsü; ibaji November 12, 2018 nü ataloka liasü, ta kasa sangdong nung shia lir.
Iba sülen tenati truck tazüngji anir ajen, ajisüaka osang ka nung ajemdaker Haryana Registration No. keta aliba truck ji Toluvi village nung aliba ki ka nung angu; iba sülen Toluvi village nung aliba ki kibur arishi küm 42, Khekuto apu, ta sangdong nung shia lir.
Truck anguba sülen tai tonglokja alir tongti anaji Dimapur nung apu; driver ji tang local hospital nung anepalua tajungba kümdar, aser maneni bushisüngdangtsü atema Chumukedima Police Station nung ken o ka benokogo, ta kasa sangdong ajanga metetdaktsü.