NNPGs indang WC-i tenüngsang agütsüba sentong agi

Dimapur, Yimpoksüi (November) 17 (TYO): India sorkar den tang olemtepba Naga National Political Groups (NNPGs) indang Working Committee (WC)-i Oking, New Delhi nung tenüngsang agütsüba sentong ka agi.
Sentong nung o jembidang NNPGs WC Convener aser GPRN/NSCN Ato Kilonser, N Kitovi Zhimomi-i “Tsüngremi NNPG lennir shia meteta aser angateta lir” ta ashi.
Tesüiba mapang Naga nungeri tebangi meshitetba tekangshitem ajuruogo aser lennir shiai item tekangshitem atema tebilemtsü abentsüla. Tawa Tsüngremi civil society tem, sobaliba senmangertem aser shisashirtem amshir, aser parnok ajanga NNPG lennirtemi tangar dang nungi temaba ta sür aliba tangatetba agiendaktsür. Tsüngremi shimtetba tebur aser tetsürtem dak sempet balala keta lir aser parnoki NNPG lennirtem tsüngda tenokdangbatem ajak agientsür aser tanü Naga yimten mapa inyakyim tasen ka tenzükogo, ta Kitovi Zhimomi-isa ashi.
“November 17, 2017 nü India sorkar aser Naga nunger tenüng nung Working Committee (WC)-i tezüngzüktep agiba ajanga Naga nunger putiotsü aser yimten jenjang tanaben agizükshiogo. Tarutsü putui iba nung ammettsü aser ajemdaker inyaksangshitettsü. Küm ka tsüngda India sorkar aser WC tsüngda yimten olemtep tenemben tashi liogo aser onük shia kanga dang shisadanga aser mapa küma inyaktettsüsa jembia arudar. Item ajak asosho Tulusang Tsüngrem nem tenüngsang agütsür,” ta paisa ashi.
Naga nungertemi onok nungitba aser sarasademtsüba atema kanga pelar. NNPG lennirtem indang teinyaktsüji Tsüngremi mulungba ama inyaktsüla aser nübortem taginüba tongtsütsüla. Lennirtem yimten tsütsü, asalentong aser tangatetba balala liaka, ita ishika tsüngda Tsüngremi Naga lennirtem tangatetba melenshitsü aser senden amen shia tali taremzükba, yimya awashi temetetba aser ajemaluba akümer. Tang onok kati ka dak temulung lemteper aser India sorkar tebilemba o Naga yimten taginüba madak Tsüngremi tatembang telemtetba agütsütsü ta amanger, ta paisa shisem.
Iba sentong nung Co-convener Y Wangtin Naga, President NSCN(R) Co-convener Hozheto Z Chophy, General Secretary NNC/GDRN, co-convener Kiumukam Yimchunger, President, NNC/NPGN aser Co-convener Toshi Walling, NNC (Parent Body) nungertemi o jembi.
Tanga nüngdak kar atema aoba ajanga Co-convener Zopra Vero, Kedallo FGN-i iba sentong nung medentet.
Sentong nungsa NTC peace mediation Convener aser taoba NSF President Yesonu Veyie aden aser pai o jembidang tesüiba mapang asen nübortemi tekangshi ajuruba aser tanü Tsüngremi asen lennirtem longjemdaktsüba indang ashi.
Paisa Naga lennirtem dang Tsüngremi dang Naga nunger asoshi sayatenya inyaktsütsü anungji tamang ka-ang ta ayongzük.
Yesonu Veyie-i lennirtem atema Tenüngsang Ken 23 azüng aser tenüngsang agüja sarasadem.
Sentong nung mendenji Co-ordinator WC Alezo Venuh liasü.