Zunheboto nung World Diabetes Day ayonga among

Zunheboto, Yimpoksüi/November 18 (TYO): Linük tesem ajak den liromedema Zunheboto nunga November 14, 2018 nü GPS, Old Town Zunheboto nung “The Family and Diabetes – diabetes concerns every family” omen nung ajemdaker World Diabetes Day ayongzüka mongogo, ta tanü CMO office Zunheboto District Media Officer, Shekho Sophie-i sangdong ka ajanga metetdaktsü.
Okila ajembidang CMO Zunheboto, Dr. C. W Tungoe-i lokti dang anema alitsüsa libalirotsü, chiyungtsü shidak achitsü, exercise teti agitsü aser mapang shia blood sugar tendangtsü ayongzüka liasü.
Paisa, World Diabetes Day amongba nükjidong ya nüburtem dang Daibetes ajanga timtem agutsüba awareness agutsütsü aser Health units nung anguba facilities metetdaktsütsü atema lir, ta ashi.
Pai ashiba agi, diabetes agi nisungtem masür saka diabetes ajanga timtem balala agutsüba ajanga asür, kechiyong diabetes ajanga temang nung tongtibang tenük-telen raksatsür aser tesüsabo diabetes agi shirangertem temang shilem aikati mapa meinyaki asür.
Paisa, diabetes tapu ana lir- Type 1 Diabetes ji nokdangtettsü makok saka insulin injections agi anepaluteter, aser tanabuba nung Type 2 diabetes ji asen temang nung insulin-i mapa meinyakba ajanga lir, ta ashi.
Dibates agi kongshir shilem 80 bo exercise teti agiba, chiyungba yimya azüokba aser anibelem mesüi taküm anema alitsüsa libaliroba ajanga nokdangteter, ta paisa shisem.
Kasa anogomong nung IEC Materials angati lemja liasü.
Iba sentong ya Media officer, Shekho Sophie leniba nung agi aser screening camp ka agia nisung 91 dak blood sugar tendanga liasü.