Bru Refugees-i Mizoram election nung vote agutsütsüa akok

Aizawl (Mizoram), Yimpoksüi/November 18 (Agencies): Tesüiba küm 22 tashi north Tripura nung aliba relief camps balala nung jenoka alir Bru refugee temi taoba election tem nung postal ballots ajanga vote agüja aruogo, aser maneni taruba Mizoram Assembly election nunga vote agutsütsüa akok.
Aizawl nung osangbenertem senden ka nung jembidang tang tasen shimba Chief Electoral Officer (CEO) Ashish Kundra-i, Bru refugee tem indang onük süoka jembiogo, ta metetdaktsü.
“Onoki Election Commission-i telemtetba agiba atar. Mizoram telung nung Bru refugee temi vote agutsütsüa akok, aser iba tesemji Tripura-Mizoram arrtsülen Kanhmun jila nung asütsüa akok,” ta pai metetdaktsü.
Mizoram nung lokti tentet balala den yimtenren party balalai Tripura nung aliba camp nungi Bru refugees-i vote agutsüba anema nokdaker, kechiyong parnoki Mizoram-i meyipa arutsü memelunger. Iba kuli nung ajemdaker parnoki taoba CEO, SB Shashank menden nungi agientsü takhangba agüja liasü.
CEO-i, state nung polling station 38 lendong ataloktsüsa lir aser polling station 32 tongtibang ta jangjaogo aser item polling station nung CCTV ayutsü, ta metetdaktsü.
Taoba Hombarnü Kundra CEO shima liasü, iba sülen pai lokti tentet balala nungi lenirtem ajurua Bru refugees onük süoka o lemtepa liasü.