NE state temi RERA mapa küma inyaktsü melungogo

New Delhi, Yimpoksüi/November 18 (Agencies): Parliament nung Real Estate Regulation Act (RERA) agizükba sülen küm ana jungnüa arudang tatemsa Northeast nung aliba state troki iba ozüng mapa küma inyaktsü melungogo, ta osang ka ajanga metetdaktsü.
Iba Act ajanga item state nung ki alizükertem kümzüka ayutsü. Arunachal Pradesh, Meghalaya, Manipur, Mizoram, Nagaland aser Sikkim state temi ali aser tanga onüktem nung timtem aliba nung ajemdaker RERA mapa küma meinyaki liasü.
Mongputeni/October 26 nü Union Housing & Urban Affairs (HUA) Ministry nungi telok kati northeast state tem semdanga liasü aser iba mapang nung parnoki item state nungi teshimtet züngsemtem den workshop ka agia iba Act dak sendakba nung parnoki ajangshiba timtem onüktem nung o lemtepa liasü.
Osangbener den jembidang HUA Secretary, Durga Shanker Mishra-i, “Northeast state temi RERA mapa küma inyaktsü melungogo. Onoki parnok nem RERA ozüngtem metetdakja yaridar,” ta metetdaktsü.
Osang angazükba agi, taoba ita workshop agidang item state nungi züngsemtemi RERA dak sendakba timtem kar lemsatepa liasü, ajisüaka ministry nungi ketdangsertemi parnoki ratamataba ajak rajemtsüogo.
2016 küm Parliament nung agizükba Act yagi ki alizükertem nem tekümzükba agutsütsü. Pei dak apet ozüng yanglutsü aser regulatory authorities shimtsü atema item states nem tashi agutsüogo.
NE nung state 6 den West Bengal-i dang RERA magizüki liasü. Iba Act ya Jammu & Kashmir nungbo mapeter.
Union Housing & Urban Affairs (HUA) Ministry-i ashiba agi, RERA kübok real estate project 33,750 tashi register süogo aser linük tesem ajaklen agent 26,018 register süogo.
West Bengal-ibo parnok indang real estate ozüng- Housing and Industrial Regulation Act, 2017 (HIRA) benoka lir. Iba dak sendakba nung Mishra-i shidi ka ajanga West Bengal sorkar dang, real estate atema Central Act lir, anungji HIRA ji agientsüla, ta metetdaktsüogo.