Waromung Baptist Arogo nung ‘Ao Lima Tenlaki Noksatem’ kaket saya

Dimapur, Yimpoksüi/Nov. 19 (TYO): Yimpoksüi/November 18, 2018 anogo Waromung Baptist Arogo nung Associate Pastor Women, Narola ajanga ‘Ao Lima Tenlaki Noksatem’ kaket saya.
‘Ao Lima Tenlaki Noksatem’ kaket ya Waromung Baptist Arogo-i Ao lima nung aliba Baptist tenlakitem noksa ajak tangoka bendener adokba nüngo kaket ka lir. Iba kaket nung Arogo ajak agi 119 indang tenlaki noksatem lir. 1872 nungi 2018 tashi nung Ao Baptist Arogotem nung koba tashi tenlakitem renloka yanglua lir. Nisung kar dak alaka ajaki yimtsüng ajak indang tenlaki reprangnüaka mungoi liasü, saka iba kaket ajanga yimtsüng shia tenlakitem anguba den külemi yimtsüng shia kolen, koba tsükong, koba yimtsüng anasa lir aser Ao molung Mokokchung yimtiba nungi tetsüngda kilometer kwi aser mapang kwi agia talungtsü agi yimtsüng atonger ibajia kaket nung angutsü, ta Waromung Baptist Arogo nungi Pastor Meren Mollier-i sangdong ka ajanga metetdaktsü.
Azü ki nungi Aou agi adakba jara ki aser longru ki ta putu den apet melenshia yanglua arudang item Ao lima nung aliba tenlaki ajak agi 119 noksa tangoka bendener tarutsü atema tenlakitem nüngo kaket ka ama ya adoktsüogo. Tarutsü nung tenlakitem melenshia oaka iba kaket yagi yimsü agizüker küm 146 tashi nung Ao lima nung Baptist amangbapurtemi iba tashi tenlakitem yangluteta Tsüngrem külemba lanu pututemi metetsü. Baptist dak alaka tanga denomination tenlaki madoktetaka item tenlaki-tema kanga junga yangluteta kar, iba den Ao lima atena orr külen Ao Baptist Arogotem 40 tashi liaka iba kaket nung madoktet saka item Arogotem tenlaki tajung den Arogo tolu aika lir, ta kasa sangdong nung shia lir.
Ao Arogotem nung Arogo kati Arogo ka indang tia metetsü kanga nungdaka lir. Kar marble aser sentsüprang jenjang aketba osetem arangoka yanglua lir, ano kar Arogo tenlaki jara ki dena lir. Yimtsüng balala süaka item ajak Khristar Arogo dang asü nung kati ka yariteptsü kaket ajanga angateter. Yimtsüng shia nung tenlaki architect design balala jagi nisung molungang pua arua Tsüngrem sentsüwangshidaktsür. Aoertemi iba tashi yanglutetba atema aser Tsüngremer maongka tolu asoshi Tsüngrem tenüng asangtsü tetemsü, ta Pastor Meren Mollier-isa ashi.
Iba tenlaki noksa nungo kaket adokdang lim Arogotemi tenlaki tangoktsü melaba den sannüker aser tenzüketemi yaritepa atema kanga pelar ta Mr Meren Mollier Pastor Waromung Baptist Arogo ajangasa metetdaktsü.