RI District 3240 Governor Rtn. Dr. Sayantan Gupta-i Mokokchung semdang

Mokokchung, Nov 19 (TYO): RI District 3240 indang Governor, Rtn. Dr. Sayantan Gupta-i Mokokchung semdangba nüngtem nung Rotary Club of Mokokchung-i pa agizükba sentong tajung ka Elate Hostel Building nung ayongzüka katsüogo. Iba sentong nung Mokokchung nungi Rotarian-tem den ano school balala nungia Rotaract Club züngsemtem arua aden.
District Governor Dr. Sayantan-i iba sentong nung jembidang, Rotarian-tem dang koba mapasa inyakdir item ajakji tebilemba tulu yur mapatong balala bener arua inyaktsü asoshi ajungshia liasü.
“Tangar dang meshimetsüi maotsü saka pei tangatetba nung tenlatepa pelaseta tenzükba den maparen ajak nung Rotarian-temji nüburtem asoshi tatishi taküm kaka asütsü merangtsüla”, ta paisa ashi.
Tanü alima tzü mopung kanga tatsükba akümer, anungji, alima kümzüka aser wazüka ayuba maparen nung temulung agütsütsü asoshi paisa ayongzüka liasü.
Iba sentong nung “vocational excellence award 2018” ta sür Jubilee Memorial School, Principal S.K. Maiti nem senpettsü. Pai küm aika education maparen nung shilem tulu agiba ngua pa nem iba award-ji agütsü.
Sentong nung Rotary Club of Mokokchung President Rtn. Tiarenla Jamir, Secretary Rtn. Allen Mark Longkumer, Charter President & PAG Rtn. M.B. Longkumer, IPP Rtn. Dr. Takosunep, Vocational Service Chair Rtn. Imlimeren parnokia shilem balala agia liasü.