NSSATA Mokokchung Unit 2010-13 ajanga metetdaktsür

Dimapur, Yimpoksüi (November) 19 (TYO): Nagaland Sarva Shiskha Abhiyan Teachers’ Association 2010 & 13 (NSSATA), Mokokchung Unit-i state sorkar dang nangzükba ama itasen agütsütsü atema nenshia metetdaktsü.
September 26, 2018 nü Cabinet senden nung SSA 2010-13 batch tesayurtem anioktsü atema lemtetba pelaa agizüker saka June 12 nü sign sütepaka sorkar tang tashi itasen magütsüba ajanga onok timtemer, ta NSSATA 2010 &13 Mokokchung Unit sangdong ka nung metetdaktsü.
September ita nungi tang tashi onok nem itasen magütsü. Talisa, June-August itasen onok nem agütsütsü ta shiogo saka tang tashi onok ket matong lir. Itasenji angu yonga onok sentsüh ang matutsü. Sorkari itasen menur agütsüba ajanga onok sentsüh agi tsübangogo aser onok kibongtem meyariteter aser sayutsü jangraba samaa odar, ta parnokisa ashi.
Sentong aser sabang balala nung sorkari onok nem tetuyuba mesüra tajungshi o tem ashir aser quality education agütsütsü tuyur, saka külen sorkari tesayurtem aser onok kibongtem ya-tzüra ang yutsür. Metsü nung tzü shitak magütsüra alu nungi aika merohzüktsü, ta parnokisa ashi.
June 12 nü ENSF aser NSF lia tenangzüktep agiba ama onoki kulikaket balala agütsüogo aser onok indang central body executives-i anogo 24 tashi Directorate nung staff tem den yaritepogo. June 12 Agreement meraksatsü atema tepok tazüng süaka parnoki mapang shitaki nung itasen agütsütsü indang inyakyim ka tenzüktsü atema akokba tashi yaritepogo, saka tang tashi ibaji mapa küma meinyaker, ta NSSATA 2010 &13 Mokokchung Unit-isa metetdaktsü.
Khristmas mapang tonga arur anungji sorkari tan ita matemdangsa mesüra December ita tetenzüklen tashi ka nung September nungi itasen (R.o.P effected) onok nem agütsütsü ayongzüker. Onoki teyari balaka meshirba masü saka onok tangutsü tim itasen meshir, anungji onoki pei pei school nung kaketshirtem ajungtsü atema teinyaktsü shitak inyaka aruba ama itasen mapang shitak nung aginür, ta parnokisa ashi.