AAP Nagaland Unit-i Naga Peoples’ Front (NPF) den loktep

Dimapur, Yimpoksüi (November) 19 (TYO): Aam Aadmi Party (AAP) indang State unit-i tanü Nagaland nung Naga Peoples’ Front (NPF) den loktepogo aser iba ya NPF atema teyari ka asütsü.
NPF Central Office nung sentong ka agidang AAP Nagaland president den otongdar Dr Lemwang Chuhwanglim nati NPF president Dr Shurhozelie Liezietsu nem party indang executive ketdangsertem tenüng agütsü.
AAP ya May 2016 nung Nagaland nung tenzük aser taküm February ita Assembly election nung menden 3 nungi toktep saka ka nung danga takok mangu.
Dr Shurhozelie-i AAP ketdangsertem aser züngsemtem NPF nung pela agizükdang, iba anogo ta Naga putiotsü nung tongtipang anogo ka ta züluoktsü, ta ashi.
“AAP ya tashi tait party ka lir aser Linük yimtiba nung sorkar kümteta yimsü asür. Centre sorkari tenokdangba aser timtem agüjaka, Delhi nung aliba nübortemi tangatetba shitak nung posema nungitba ajanga sorkar melaoi lir” ta paisa ashi.
Nagaland ya state tila ka dang saka tashi itta alitsü atema longjemtsü nüngdaker. Asenok loktepba ya putiotsü nung tongtipang tatalokba ka lir aser Nagaland tashi taitba kümdaktsütsü atema loktepba atema züngsemtemi sasa mebilemtsü saka jangratema bilemtsü, ta NPF president-isa shisem.
Tanga state tem nung political party temi terenlok aser rongsenkettsüng jenjang tajungba kümdaktsütsü atema tashi angutsü atema politics asayar. Nagaland nunga item teinyaktsütem asenoki reprangtsüla saka NPF indang teinyaktsü tongtibaji Naga Political Issue (NPI) latettsü atema lir, kechiyong iba onük mebentet tashi asen tarutsü tia meshiteter, ta Dr Shurhozelie-isa ashi.
Alima nung political tebilemtsü talangtiba melatetbaji NPI lir aser NPF-i teloktem tsüngda teyariteper ka ama inyaka arur. Ajaki mulunga agizüktsüsa latettsü atema onoki yariteper aser iba onük mebentet tashi party-i mapa inyaktsü. Naga yimten tebilemtsü nung onok kibur masü saka tiyongtsü nung jembirtem lir aser maneni telok anaprong dang tekaraba nung latettsü atema mepishitsü, ta paisa ashi.
NPF-i Naga nunger maitsü aser tangatetba atema noktaker aser AAP-i NPF nung loktepba ajanga party tali tashi aittsü, ta paisa shisem.
“AAP-i jungjunga asadangba aser sentong renemba sülen ang NPF den lokteptsü telemtetba agi. Political party na loktepba ajanga Nagaland state tali renlokdaktsütsü nükjidong nung iba telemtetba agi” ta AAP Nagaland president Dr Amos-i ashi.
“Naga nunger renloktsü atema aser ochimashi anema inyaktsü alizüng yur onoki NPF den lokteper. NPF ya Nagaland nung mezüngbuba regional political party lir aser iba telok wazüka ayutsü nükjidong nung onok adener. Talisa, Dr Shurhozelie lenisüba kübok NPF-i Naga nunger taginübatem tongtsütettsü ta onoki amanger, ta paisa metetdaktsü.
AAP Nagaland otongdar Dr. Lemwang Chuhwanglim-ia o jembidang, AAP-i NPF den loktepba ajanga NPF nem tashi talila agütsüogo aser külemi ola tuluba adoktsü aser temeten bener arutsü inyaktsü teimla lir, ta ashi.
Rajya Sabha MP aser NPF secretary general K G Kenye-i jembidang “political party kati opposition den loktepbaji odangbo matalokba mapa ka lir. Iba ajanga BJP national secretary Ram Madav-i February 2018 elections sülen Naga nungeri NPF senzüka yutsüogo ta jembiba nembangtsür” ta ashi.
Naga nungeri NPF toktsü süra kechiba political party temi onok den loktepnür? AAP-i NPF den loktepba ajanga party tashi aittsü aser Naga nunger ajungtsü atema mapa tuluba inyaktsü imlar, ta Kenye-isa shisem.