Dimapur police-i nisungpur 3 apu

Dimapur, Yimpoksüi (November) 20 (TYO): November 19, 2018 nü Dimapur Police-i sen yong nisung pur aoer nisung asem apu, ta Addl. Dy. Commissioner of Police/PRO, Dimapur-i metetdaktsü.
Par asemji Yaruingau Keishing (38 yrs), Wangreingam Hungyo (23 yrs) aser Thangmeiso Hungyo (22 yrs) nungertem ta jangjaogo aser par asemprongla ya Manipur kübok Senapati nungi lir.
Mejangjatetba nisung kari tzümar ka pua lir aser pa chioktsü atema sen lakh 10 meshir ta November 18 nü ken o ka benokba sülen special police team kati Dimapur jila nung aliba hotel ka nungi tzümarji kümzük.
Iba mapang police-i hotel nung Wangreingam ta ser nisung ka apu. Iba sülen iba tasa atonger Yaruingau den yariteper Thangmeiso na tesem balala nung apu.
Police-i parnok dang asüngdangya asüdang police nungi jenbutsü atema par asemi apuba nisungji hotel balala nung anenzüka senzü ta nangzük.
Sen kecha magütsü tsüngda police-i nisungji kümzük aser pa apurtem ket nungi mobile phone 3 den SIM card 4 tashi ngutetogo.
Iba dak sendakba nung East Police Station nung ken o ka benokogo aser maneni bushisüngdang südar.