BSNL puri Prepaid Plan tasen ka sangdongogo

Yimpoksüi/November 21, 2018 (Agencies): BSNL puri taküm Rongjui/Sept nung parnok prepaid customer tem atema parnok indang data plans tem nung data talila 2.2GB bendenlokja liasü. Iba offer ya Rongjui/September 14 tashi atema dang liasü saka company-i maneni Yimpoksüi/Nov 14, 2018 tashi atsülangja liasü. Nüburtem nungi telangzüba tajung anguba sülen tang maneni telecom company-i iba offer ya ano atsülangtsütsü asoshi telemtetba agiogo. BSNL puri ‘Bumper offer’ indang validity ya Aenjeti/Jan 31, 2019 tashi atsülangtsüogo aser taoba mapang anogo shia data 2.2GB agüja aliba 2.1GB kümtsüogo.
Kasa mapang nung Jio indang sen 1,699 alang prepaid plan kübok aongoshia 4G data 1.5GB agütsür koba ajak senteper 547.5GB tajangzük agütsür. Jio amshirtemi iba plan recharge süra FUP limit melei unlimited voice calls den anogo shia SMS 100 angati amshitettsü.
Tawa BSNL puri sen 1,097 alang plan tasen ka sayaogo, kong nüburtem nem anogo 365 atema 25GB agütsür. Iba plan kübok unlimited voice call agütsür saka Mumbai aser Delhi circle nung aliba number tem dangi dang call sütettsü. Iba plan tasenba ya Kolkata circle nunga amenokogo aser Aenjeti/Jan 6, 2019 tashi amshitettsü.