Lapang ya NPP atema shisa agütsür aser len tuyur ka asütsü: Tynsong

Shillong, Yimpoksüi (November) 21 (Agencies): Taoba Congress lennir D D Lapang-i tang Meghalaya Democratic Alliance (MDA) sorkar atema Chief Adviser inyaker aser pai NPP atema shisa agütsür aser len tuyur ka ama inyaktsü ta Meghalaya Deputy Chief Minister & National People’s Party (NPP) lennir Prestone Tynsong-i ashi.
Hombarnü Lapang-i pa posemertemi ashiba ama pai NPP nung adentsü lemtetogo ta osang metetdaktsü.
AICC president Rahul Gandhi-i lennir tejen aser taintem melentsü mapa inyaker ta Lapang-i tai tonglokja September 13, 2018 nü Congress toktsü.
Taoba ita ana shi Lapang-i pa koba telok nung adentsü’er olen kecha mejembii dang aru.
NPP nung Lapang-i kechi mapa inyaktsü ta osangbenertemi asüngdangdang Tynsong-i “pa onok nem shisa agütsür aser len tuyur ka asütsü” ta langzü.
Lapang-i NPP nung adenba ajanga party tashi itshitsü. Meghalaya nung yimten lennir tejentibaji pa lir aser pa tang tashi politics nung teyakyak lir anungji pa adenba ajanga party tashi aittsü, ta Tynsong-isa metetdaktsü.
Taruba Lok Sabha elections nung Lapang-i Shillong constituency nungi NPP candidate ka ama tokteptsü asü ta asüngdangdang “Ni Lapang-i media dang elections nung shilem magitsü ta ashiba züngshiogo” ta Tynsong-isa ashi.