Arunachal sorkar anema lungkak ait

Itanagar, Yimpoksüi (November) 21 (Agencies): Mongulbarnü Arunachal Pradesh yimtiba Itanagar nung “Arunachal against Injustice” ta ser lungkak aitba sentong ka ayonga agi.
Iba sentong nung kaketshirtem dena telok balala nungi züngsemtem aden aser parnoki state sorkar aser talisa Home department-i sensotem kümzüka aser law & order tiptema meyuteter ta tai tonglokja lungkak ait.
Iba sentong ya ‘Arunachal against Racist’ kübok ayongzük aser asür Toko Yame, Arun Modi, Ojing Tayeng aser taoba MLA Ngurang Pinch nunger kinungertemia shilem agi.
Parnoki Home Minister Kumar Waii dang mapa nungi anenang ta takhangba agütsüba den asürtem- Yame, Modi, Tayeng o Pinch nunger asüba osang tejangja sangokjang ta akhang.
Indira Gandhi Park nung aliba Tennis Court nung o jembidang asür Pinch’er jala Ngurang Reena-i ashiba agi, “kübo sür küm ka süia arur saka ketdangsertemi tang tashi iba ken o mebushitet lir.”
“Onoki State Chief Minister dang aiben shiaka pai ola madoker aser iba ken o memetet. CBI-ia iba ken o bushisüngdangtsü atema mejangrar” ta lai ashi.
Onoki MoS for Home Affairs den ajuruteptsü atema shidi ka züluogo saka tang tashi pai nungi telangzüba kecha mali ta Reena-isa shisem.
Yaküm November 18 nü Popum aser Pare ayongtem ajurutepdak asür Pinch indang mang angu. Pinch ya telok ka den rafting expedition atema ao saka par kibongi pa ya yimtenren tsütsü tasa atonger tepset ta tai tongloktsür.
Ano, asür Toko Yame tebu Khoda Yame-ia ashiba agi, küm ka süiaka Police Department-i tang tashi charge sheet ka danga mebenok lir.
Yame ya Government Higher Secondary School (GHSS) nung class 12 kaketshir ka liasü aser yaküm September 16 nü GHSS o Jawahar Navodaya Vidyalaya (JNV) kaketshirtem tsüngda mepetmesü adokba sülen pa samar bushitep. September 23 nü JNV anasa aliba Biga waterfall nung pa indang mang angu.
Taoba All East Siang District Students’ Union nung finance secretary asür Taying aser Indira Gandhi Government College (IGGC) nung 5th Semester student Arun Modi’er kinungertemia kasa otsü lemsatep.
Yaküm June 10 nü Itanagar nung mejangjatetba nisung kari Taying yirutsü aser anogo ishika lir pa GNRC, Guwahati nung asü.
Arun Modi ya samar bushitep aser yaküm September ita pa Botanical Garden, Tezu anasa water tank ka nung pa mang angu.