Swaraj-i Parliament toktsütsü aliba atema ni mepelar: Shashi Tharoor

New Delhi, Yimpoksüi/Nov 21 (Agencies): Party tangatetba balala süaka Congress MP, Shashi Tharoor aser BJP lenir tain External Affairs Minister, Sushma Swaraj na tsüngda akhümtsübutep aliba atema aikati twitter ajanga tena nem tenüngsang agütsüdar.
Yashi Union Minister, Swaraj-i 2019 küm Lok Sabha election nung lai metokteptsü, ta sangdonga liasü.
Iba dak sendakba nung taoba mapang external affairs minister, Tharoor-i twitter ajanga, “Yimtenren nung onok tangatetba balala liaka Sushma Swaraj-i Parliament toktsütsü ta sangdongba atema ni mepelar. Outlook India indang social media awards tendanger rongnung Chairman ka ama ni tepela nung la nem Twiplomacy agutsü. Parliament’s ExtAffsCmt (External Affairs Committee) Chair ka ama ni la EAM (external affairs minister) inyakba nükshia liasü,” ta metetdaktsü.
Ibaji langzüa Sushma Swaraj-i, “Nü o tajung atema pelar, Shashi. Peipei menden nung anapronglai maneni inyaktsü ni amanger,” ta ashi.
Maneni ibaji langzüa Shashi Tharoor-i, “Ibaji anati vote agutsürtem nem telemtetba agidaktsüdi,” ta ashi.
Ano Congress lenir aser taoba mapang Union Finance Minister, P Chidambaram-ibo, Swaraj-i 2019 küm election nung metoktepbaji la nija kuli ajanga masü saka yimtenren kuli ajanga lir, ta ashi.
Twitter ajanga Chidambaram-i, Swaraj-i BJP-i Madhya Pradesh nung tamakok angutsü, ta asadangtetogo, ibayongji lai election nung metokteper, ta ashi.
Ajisüaka Chidambaram-isa, Swaraj shiranga liaka lai linük akhümketa tenzükogo, ta tenüngsang agutsü.
Yashi osangbenertem den jembidang arishi küm 66, Swaraj-i, “Party-i dang telemtetba agir, ajisüaka ni temang manemba nung ajemdaker ni taruba (Lok Sabha) elections nung metokteptsü telemtetba agiogo,” ta metetdakja liasü.
La 2016 küm tezüngjang melena liasü.