Bru refugee temi Mamit district nung vote agütsütsü

Aizawl, Yimpoksüi (November) 21 (Agencies): Tripura nung aliba Bru refugee temi Mizoram nung Kanhmun yimtsüng nung vote agütsütsü akok Election Commission of India (ECI)-i parnok Mamit district nung vote agütsüdaktsütsü atema telemtetba agi.
Mizoram Assembly elections matongdang Bru nunger voter 11,232 vote agütsütsü tesem ya kanga dang ashishitep aketba ken o ka aküm. Iba ajanga election agitsü anogo 20 shi dang anünga lia Chief Electoral Officer SB Shashank mapa melen.
Bru voter temi Tripura nung aliba relief camps nung vote agütsütsü atema Shashank-i mapa inyaka aru.
Mizoram litsü kübok Kanhmun yimtsüng nung Bru nunger vote agütsütsü atema mapa inyakang ta Election Commission-i onok dang shiogo. Iba atema onoki mapa tenzükogo, ta CEO office nung ketdangser kati metetdaktsü
Iba tetuyuba indang shidi ka anogo ka mesüra ana tsüngda Mizoram CEO Ashish Kundra ket atongtsü akok, ta paisa ashi.
Kanhmun ya Mizoram aser Tripura tsüngda arrtsülen aliba yimtsüng ka lir.
“Tesüiba küm ishika, electoral rolls meyipa mereprang. Tangbo onoki ibaji inyakogo. Bru refugee tem Assembly constituency 9 nung züngsema lir aser iba amaji special booth ka nung voting machines balala yutsütsü, ta ketdangserisa ashi.
Bru nunger teimba züluoka alibaji Mamit district nung lir. Iba nung Hachhek, Dampa aser Mamit constituency tem lir aser refugee tem vote 14% lir.
Maneni, Kolasib district nunga Bru vote (3.5%) lir. Iba district nung Tuirial, Kolasib aser Serlui Assembly mendentem lir. Lunglei district nung Bru refugee vote 1% dak teküpok lir.