Acharya-i GB tem dang pelar; Yimjung atema inyaktsü ajungmeso Khango-i aniba NSCN (K) den yimjung olemtep tenzüktsü mepishir: GBs

Dimapur, Yimpoksüi (November) 21 (TYO): Nagaland ketdangsübaren nung GB temi tongtipang mapa inyaker aser parnok ya state sorkar nung kanga dang nüngdakba shilem ka lir ta tanü Nagaland Governor PB Acharya-i ashi.
Nagaland nung GB temi tensa tajungba kümdaktsüba aser linük yangerba mapa nung shilem tajung agiba atema tenüngsang agütsür, ta paisa ashi.
November 21, 2018 nü Raj Bhavan, Kohima nung Nagaland GB Federation ketdangpurtem den ajurutepa senden ka amendang Acharya-i iba osang metetdaktsü.
“Yimtsüngtem yanglutsübaji GB tem lir anungji nenoki Centre aser State sorkar indang welfare schemes & programmes tangutsüpur nem osang tejangja sangoktsütsüla. Iba ajanga asen loktilba renloktsü aser tejakleni aotsü” ta pai ayongzük.
Tanü Nagaland nung yimjung nüngdaker anungji nenoki anibelem arema iba atema mapa inyaktsü ayongzüker. Yimjung olemtep tim lenmang nung odar aser tekaratiba nung telemtetba ka agitsü imlar, ta Governor Acharya-isa shisem.
Tanü Nagaland GB Federation ketdangpurtemi Governor nem memorandum ka agütsü aser iba nung India sorkari tekaratiba nung Khango Konyak-i aniba NSCN-GPRN yimjung olemtep nung adentsü jaoktsü atema mepishia lir.
Nagaland GB Federation President Shahlem Konyak-i anir teshimtet teloki Governor den ajurutep.
Governor Acharya-isa Naga Mothers Association (NMA) dang state nung yimjung aser putepa alitsü indang mapa inyakba atema tenüngsang agütsü.