Chare EAC Office Hon Jubilee mungogo

Dimapur, Yimpoksüi/November 22 (TYO): Tuensang district kübok Chare, Extra Assistant Commissioner Administrative Headquarters, Hon Jubilee (1968-2018) office kima Yimpoksüi/Nov 20 2018 nü mungogo. Iba sentong nung 52 Longkhim-Chare AC, MLA, Muthingnyuba Sangtam tetushi tesemdanger asü.
Hon Jubilee sentong nung lokti tentet balala nungi lenirtem, Department balala nungi tekolaktem, village council züngsemtem, DBs, GBs, Arogo tenzükertem, Tribal Hoho züngsemtem, Kaketshir lokti lenirtem, alakteta tejaokertem aser nüburtem aika arua aden.
Chare administrative post ya 1956 küm Area Bench Court ta sür amenok. Iba sülen 1960 küm Area Superintendent-i ajungket aser tatemsa 1968 küm full fledged Circle Officer jenjangi ajungket. 1975 küm old Chare town tesem melenshia tang aliba tesemi belener ao.
Sentong nung o jembidang MLA, Muthingnyuba Sangtam-i, iba sentong meraketa ayongzükba atema ADC Longkhim, EAC Chare aser nüburtem tenüng asang. Pai, Departmental Officers balala dang iba tesem terenlok asoshi bendanga agüja inyaktsü ajungshi. Paisa, Department balala ya nüburtem ajangzükdaktsütsü asoshi bendanga agüja inyaksangshitsüla ta nenshia ashi. Maneni Sangtam-i, DBs aser GBs tem dang iba tesem nung temzüng ozüng tsütsü tetsükdaktsü madoktsü atema local administration den teka amteper inyaksangshitsü ajungshi.
Sentong nung lokti pelaa agizükba o jembidang EAC Chare, Kupeusing Meru-i, iba benjungmung ya sorkar aser Chare telungtet nung aliba nüburtem asoshi otsüsütsüsa alizüng tongtetba mapang ka lir, ta ashi.
Sentong nung tetushi tesemdangeri Jubilee nüngshi long aser souvenir laokja liasü aser BYE Choir-i ken tajung ka aten. Maneni Trongar, Chare aser Kiding yimtsüng nungi tsüngsangba teloktemi sobaliba tsüngsang balala ia shilem agi, ta DPRO Tuensang sangdong ka ajanga metetdaktsü.