Saina, Sameer aser Kashyap nunger quarter tongogo

Lucknow, Yimpoksüi/November 22 (Agencies): Syed Modi International World Super Tour 300 badminton asyamung Yangtepnü/Thursday asaya nung taoba SMI takok angur India nunger Sameer Verma, Saina Nehwal aser Parupalli Kashyap nungeri pei tata asaya nung takok ngua quarter-finals tongogo.
Seed tanabuba nung alila Saina, shibai iba (Lucknow) asayamung asenben tashi takok ngua lir, lai iba asaya nung külem India tsür Amolika Singh Sisodiya madak 21-14, 21-9 agi takok angu.
Tebur kija asaya ka nung 2012 aser 2015 küm takok angusang Kashyap aser Indonesia nunger Firman Abdul Kholik na tsüngda asaya liasü. Mezüng set asaya nung Kashyap kanga dang mejungi 9-21 agi tamakok angu. Iba sülen tanüngba set anaji ayonga Kashyap-i 22-20, 21-8 agi Firman tsükdaktsü.
Kasa asayamung tebur kija asaya tanga ka nung seed tasembuba nung alisang Sameer-i China nunger Zhao Junpeng madak 22-20, 21-17 agi takok angu.
China nunger Zhou Zeqi den Sameer Verma quarter-final asayatsü jangjaogo.
Taoba Olympic nung bronze medal angula Saina aser seed 8buba nung alila külem India tsür Rituparna Das na quarter-final asayatsü. Tetsür kija asaya tanga ka nung Rituparna-i 21-11, 21-15 agi külem India tsür Shruti Mundada tsükdaktsüogo.
Ano külen Kashyap aser seed 8 buba nung alisang Thailand nunger Sitthikom Thammasin na tsüngda quarter-final asayatsü.
Tebur kija asaya tanga ka nung seed pezübuba nung alisang India nunger B Sai Praneeth-i Indonesia nunger Shesar Hiren Rhustavito 21-12, 21-10 agi tsükdakja liasü. Taruba asaya nung seed 6buba alisang China nunger Lu Guangzu den Praneeth tokteptsü.
Asaya tanga ka nung Guangzu-i Saarlorlux asayamung takok angusang India nunger Subhankar Dey madak 21-13 21-10 agi takok angu.
Kasa asayamung tetsür kija asaya tanga ka nung India tsür Sai Uttejitha Rao Chukka-i külem India tsür Reshma Karthik 21-12, 21-15 agi tsükdakja liasü.
Taruba asaya nung Chukka-i taoba Olympic nung takok angula aser seed 7 buba nung alila China tsür Li Xuerui den asayatsü.
Temeyoktep tarep asaya nung India nunger Satwiksairaj Rankireddy aser Ashwini Ponnappa nati külem asayar Shivam Sharma aser Poorvisha S Ram madak 12-21, 21-14, 21-15 agi takok ngua quarter-final tongogo.