6buba Kohima District Open Volleyball Tournament tenzükogo

Yimpoksüi 22 nü, KMC Administrator Kovi Meyase aser 6buba Kohima District Volleyball Tournament ayonger aser Phesama YO aser Khwüno Spikers Khonoma nungi asayartem tangokba noksa nung angur.

Kohima, Yimpoksüi/November 22 (TYO): “Transcending through Sports” omen nung ajemdaker Kohima District Volleyball Association (KDVA) puri achaayanga 6buba Kohima District Open Volleyball Tournament (tebur & tetsür) Yangtepnü Kohima Local ground nung tenzükogo.
Iba asayamung nung tetsür telok pongu aser tebur telok 15-i shilem agidar aser Yimpoksüi/November 26 nü tembangtsü.
Asayamung lapokba sentong nung Kohima Municipal Council (KMC) Administrator Kovi Meyase tetushi tesemdanger ama arua shilem agiogo aser pai lanurtem nem parnok sempet sayutsü aser train asütsü maongka agütsüba atema KDVA tenüngsanga liasü.
Sentong nung o jembidang pai, sports ya alima nung industry tulutiba kümogo aser iba luyim nung takok ngua aoertem sen aika aazüker rongnung züngoksemer, ta shia asayartem dang temaba jenjang tongtettsü asoshi bendanga agüja inyaktsü ajungshi.
Kovi Meyase-isa, asaya nung tajungkaji saisapong ajanga kin aser jenjang mebendanger aser ajak temzüng ka kübok alener, ta ashi.
Paisa, asayartem dang parnok indang sempetem yimya tajungtiba benshia sayutsü aser temaba jenjang tongtettsü asoshi tejaklen aotsü ajungshi.
Asayamung lapokba sentong ya organizing committee convenor Hulie Belho lenisüba kübok aka aser Denben Yanthan-i sarasademer tenzük. Kasa mapang nung KDVA tir Visasielie Suohu-i lokti pelaa agizükba o jembi aser Mengubei-u Khro-i ken tajung ka aten. Technical convenor Mhalevilie Kere-i asayartem tenangzüktepba agiba sentong achaayanga agi.
Asayamung tenzüker mezüngbuba anogo defending champion Phesema Youth Organization, Kiruphema Youth Organization, United Sporting Club Kiruphema aser Kenozou Youth Organization nungeri pei tata asaya koka point troktrok ngur tebur tetoktepba nung temaba jenjang nung lir. Tetsür asaya nung , Elite Sisters Club Sepfuzou Colony Kohima aser Tiema Khe Kidima nati point trokrok ngua temaba jenjang nung lir.