Azo-i Lasumi Council Hall lapoktsüogo

Phek, Yimpoksüi/November 22 (TYO): Phek district kübok Lasumi yim nung MLA Kuzholuzo (Azo) Nienu-i Yimpoksüi 22, 2018 nü Lasumi Council Hall lapoktsü.
Iba Council Hall ya Mahatma Gandhi National Rural Employment Guarantee Act (MGNREGA) 2017-18 kübok yanglu.
Sentong nung o jembiba mapang, iba Council Hall yanglu tenzüker külen nungi tembanga yangluba tashi maparen achaayangertemi sen timi ketdang asüba atema pelaba lemsatep aser Lasumi Council Hall state nung council hall rongnung tajungtiba ka lir, ta ashi.
Senotsü timi ketdang asüba atema yimsüsertem nem tenüngsang agüja, lenla ajunga nung terenlok alitsü atema yimsürser tsüngda ochishiba aser telungjem alitsüla, ta Azo-i tayongzükba agütsü.
Tang tasen yangluba Council Hall ajanga Lasumi yim nung alir nüburtem tsüngda telungjem tali dang akangshitsü aser ochi adokdaktsütsü, ta Azo-i kanga dang pelaa metetdaktsü.
Kasa sentong nung project director DRDA Phek, Keyirangding Hegui-i jembiba mapang, pai, iba maparen inyakyim jenjang ngua temulung achiba lemsatep aser senotsü timi ketdang asüba ajanga iba maparen takok angu, ta ashi.
Tarutsü anogotem nunga sorkar nungi terenlokba maparen maongka angutsü asoshi yimertemi sorkar den tesendaktep tajung ayutsü asoshi, Hegui-i tayongzükba agütsü.
Nagaland State Legal Service Authority, member secretary, Muzivolii T. Therieh-i jembiba mapang, iba Hall ya tetsür aser tebur atema ochi obendang agütsüba sabang ka ama benshidaktsüner, ajiasünungang tajung adoktsü, ta ashi.
Therieh-i ashiba agi, Nagaland nung yimtsüngtem ya state tilala ama lir kechiyong Legislative, executive aser judicial tashi ajakji Village Council Act ajanga agütsür. Ajiasünung, yimertem ajangzüktsü atema yimsüsertemi pei tashi shisaka amshitsüla, ta metetdaktsü.
“Village administration ya district administration indang kongsang ka lir, anungji parnok teinyaktsü shilem tuluka lir, ta laisa metetdakja liasü.
Sentong tenzüka, Lasumi Baptist Church pastor, Rev. Dr. Dingu Kenye-i sarasademtsü. Neiziilo Therie menden liasü aser kasa sentong nung Lasumi village council chairman, Lonyichii Pradia-i telok pelaa agizükba o jembi.
Lasumi women VDB secretary Achiile Kromi-i tepela o jembi aser Lasumi VDB secretary Kewekope Marhu-i tepela anküp o jembi.