NPP Nagaland State Unit Team-i Mizoram election atema nübo yimtsü

Kohima, Yimpoksüi/November 22 (TYO): National People’s Party (NPP) Nagaland State Unit Team-i State President aser Chairman Nagaland Hotels Limited, Ato Yepthomi aser Advisor Industries & Commerce & NIDC, Imnatiba Jamir nunger leniba nung Mizoram assembly election nung Party candidate tem atema nübo yimtsüogo, ta tanü NPP-i sangdong ka nung metetdaktsü.
Yimpoksüi/November 26, 2018 nü 7buba Mizoram Legislative Assembly Elections agitsü aser assembly menden 40 nungi NPP-i menden 9 nung tokteptsü.
NPP Nagaland State Unit Team-i menden 9 nungi menden pezü atema nübo yimtsüba assembly constituency temji Serchhip, Serlui, Kolasib, Tuirial aser Vairengte lir.
State team nungsa Samuel Sumi, State Secretary (Organisation) aser Limanuksung Longkumer, State Secretary (Political Affairs) na densema lir.
Mizoram nung Party National Observer atema State General Secretary, Sasank Ghatraj shimogo, aser pa yangji oa mongdar.
Mizoram nung NPP ya Rongjui/September 29, 2018 nü tenteta liasü aser parnoki taruba election nung menden 3-5 nungbo takok angutsü imlar, koba ajanga election agiba sülen sorkar akumba nung parnoki tongtibang shilem ka agitettsü, kechiyong state nung hung assembly imlar.
2013 küm Northeast nungi yimtenren lenir takotet rongnung ka aser taoba mapang Lok Sabha Speaker, asür, P.A. Sangma-i NPP party asentenshia tenzüka liasü aser pai Khristan, Tribal aser Minority tem temeden atema ola adoka aruogo.
Iba mangdangji Northeast nüburtemi keta-sena liasü aser mapang tatsüka tsüngda tangbo tesem nung tashi taittiba regional Party ka kümogo, aser Northeast nungi mezüngbuba National Party akumtsüsa lir.
Iba party ya National President aser Meghalaya Chief Minister, Conrad A. Sangma leniba nung lir.
Manipur nung Deputy Chief Minister aser Cabinet Minister asembo NPP nungi lir, aser Nagaland nung NPP ya state party ka ama recognize süa tang PDA sorkar nung Advisors ana lir.
Iba dak alia Arunachal Pradesh nunga party MLA 7 aser Rajasthan nung MLA ka lir.