BAN, DCCI nati injang khaloktsüba aitsür; PAC nungittsü

Dimapur, Yimpoksüi/November 22 (TYO): Mongolbar nikongdang Dimapur nung Nuton Bosti junction anasa Naga tsür ka indang Honda two-wheeler showroom nung injang khaloktsüba tatalokbaji Business Association of Nagas (BAN) aser Dimapur Chamber of Commerce & Industry (DCCI) nati sashia aitsür, ta DCCI Tir, Akashe Zhimomi aser BAN Tir, Vitho Zao nati külem sangdong ka ajanga metetdaktsü.
“Nisung tamajungertemi pei takhangba ataloktsü atema tetsürtem danga maochiba ya kanga tia maka. Onoki Dimapur police dang tekaraba nung aibelenertem pua ozüng dak apet temerenshi agutsütsü akhanger,” ta kasa sangdong nung shia lir.
“BAN aser DCCI nati item mapa tamajung inyakba aser mapang shia sen akhangbaji ola madoki repranga dangbo malitsü, kechiyong shishilembartem kümzüktsü atema onok nem khuret nunglokja lir,” ta parnokisa metetdaktsü.
October 31 nü public rally nung Public Action Committee (PAC)-i renemba bangzüng ajak BAN aser DCCI nati nungiter aser PAC mapatong ajak pusemtsü, ta parnoki metetdaktsü.
Item ama mataloktsü atema shishilembartemi CCTV camera ayutsüla aser pei dokan kima tajemba agi camera kabosa ayutsüla, iba dak alia sen akhangbaji osangji tekaraba nung ozüng benokba agency tem nem metetdaktsütsütla, ta BAN aser DCCI natisa metetdaktsü.