Jammu & Kashmir nung LeT commander ka densema telungpur trok tepset

Srinagar, Yimpoksüi/November 23 (Agencies): Tanep züngia Jammu & Kashmir kübok Anantnag district nung security sepaitem aser telungpur na tsüngda raradang sepaitemi Lashkar-e-Taiba (LeT) commander ka densema telungpur trok khasetogo, ta police osang ka ajanga metetdaktsü.
Tanep züngia Srinagar nungi kilometer 48 shi pilar aliba Anantnag district kübok Setkipora yimdak sepaitem aser telungpur na tsüngda rara tenzüka liasü.
Police-i ashiba agi, LeT telungpurtemji lisopurtem lir ta jangjaogo.
Police ketdangser kati, Intelligence osang ka ajanga telungpurtem atsüka aliba metetdaktsüba nung ajemdaker police aser army nati senteper telungpur mita ao. Mita aoba mapang nung telungpurtemi tama parnok dak injang khaloktsü, iba sülen parnok tsüngda rara tenzük aser telungpur trok khaset,” ta metetdaktsü.
“Tanep Anantnag district nung raradang LeT commander, Azad Malik aser pa den külemi inyaksemer, Basit Mir na densema telungpur trok khaset,” ta osang ka ajanga ashi.
Police-i ashiba agi, tamalen Srinagar nung senior journalist aser Rising Kashmir yimobilem zülur, Syed Shujaat Bukhari tepseter telungpur asem rongnung Azad Malik-a densema liasü.
Taküm June 14 nü Srinagar Press Enclave nung aliba Rising Kashmir office kima mejangjaba nisungtemi Bukhari den pa tanüker ana densema khaset.
Anantnag nungi osang ka ajanga ashiba agi, telungpur tasümangtemji aremtsü atema parnok kinüngertem ket nung agutsüogo aser district nung tensa meraksatsü atema ketdangsertemi curfew ozüng benokogo.