SBI ketdangser Junu Sarma tepsetba atema nisung 3 apu

Guwahati, Yimpoksüi (November) 23 (Agencies): State Bank India (SBI) nung ketdangser tejen Junu Sarma tepsetba ken o dak sendakba nung temai adokba ULFA (I) züngsem ka den tetsür ka aser lanur ka puogo.
Kamrup Police-i contract killers asem- ULFA (I) züngsem Arup Das, Ajanto Kalita aser Puja Das nungertem Assam kübok tesem balala nung apu.
SULFA Arup ket nungi 9 mm pistol ka den injang round pungu ngutetogo, ta police ketdangser kati ashi.
Temai adokba ULFA (I) zünsgem Arup ya Nalbari district kübok Tihu nung alir aser pa 2017 küm police tsüngdang temai adok.
SBI ketdangser tepsettsü atema tasa atongsangji Putul Ali (Saddam Hussain) lir. Putul den bank ketdangser Sunil Kumar Mishra nati Sarma tepsettsü atong. Sarma tepsettsü atema pai SULFA Arup nem sen lakh 5 agütsü, ta police ketdangserisa shisem.
Arup-i Sarma dak injang khaloktsü aser iba mapang Ajanta-i bike ania liasü. Ajanta ya Hajo nung aser Puja ya Kulhati nung alir.
Iba ken o dak sendakba nung police-i taoba mapang loan recovery agent Putul Ali (Saddam) den SBI Dadara branch ketdangser Sunil Kumar Mishra aser Junu Sarma indang driver Pranab Kalita nungertem pua lir. Par asemprongla tepuokdak lir.
Arishi küm 56 tain SBI Dadara branch ketdangser Junu Sarma ya October 9, 2018 nü Agyathuri nung khaset. La office nungi Nizarapar, Chandmari nung lar kidangi aodang khaset.
La dak injang khaloktsüdang driver Pranab-i Sarma amenba gari ania liasü.