India-Australia na amalitepa inyaktsüsa maongka aika lir: Kovind

Melbourne (Australia), Yimpoksüi/November 23 (Agencies): Tanü Melbourne yimti nung University of Melbourne nung ‘Australia and India as Knowledge Partners’ onük nung jembidang India Tir, Ram Nath Kovind-i, “India aser Australia na sector aika nung amalitepa inyaktsüsa maongka aika lir,” ta metetdaktsü.
Tanü Tir, Ram Nath Kovind-i Australia den India nunger shisaliok tesendaktep indang metetdakja, kaketshirtem tsüngda exchange ajanga linük anaprong ajangzüktsü, ta ashi.
Paisa, “India aser Australia na tashi aitba, sobaliba temeyoktep aika aliba democracy, free press, independent judicial aliba aser English oshi ajanga asenok longjemdaktsür. Talisa asenoki cricket aser hockey den Masterchef meimer,” ta metetdaktsü.
“India Strategic Research Fund ya Australia nunger research collaboration investment tulutiba lir. Iba Fund ajanga linük anati universities aser research institutions 90 amenokogo. Ni linük semdangba mapang nung asen linük anati iba Fund atema asüngsashiogo, iba denji külemi linük anapronglai AUD sen million 10 inoksemogo,” ta paisa ashi.
“Asenok ya shisastsü bushiba lima ka nung alir. Shisaliok aser tangazükba nung asen linük ana tesendaktep junga lir. Iba atemaji ni pelar,” ta pai ashi.
India atema research partner tajungtiba linük pongu rongnung Australia densema lir, ta paisa shisem.
Tanep India Tiri Victoria Governor, Linda Dessau aser opposition lenir, Bill Shorten na ajurua liasü.
Asüngnep (Honibarnü) Kovind India-i meyipa arutsü.