Nagaland nem ‘Law and Order’ sempet agütsüba aitsür

Dimapur, Yimpoksüi (November) 23 (TYO): India Today State of State’s Survey 2018 ajanga ‘Law and Order’ telemsa nung Nagaland nem ‘Best Performing Small State’ sempet agütsüba ya Nagaland nung alirtem mezüngmeshiba inyakyim ka lir ta NPC president K. Therie-i ashi.
Linük nung Vice President-i iba sempet agütsü aser iba ajanga pai Nagaland indang tensa osang memetetba jungkai adoka sayur. Nagaland State nung law & order maparen shitak mali aser state sorkari azüoker masü saka pei sasa tentetba sorkartemi ang state sorkar azüoka lir, ta Therie-isa ashi.
Anogoshia tashiyim agi sen meshiba aser sen yong nisung pur aoba tatalokbatem lir. State sorkari yimten telok, loktitentet aser union temi tax sarutsü atema teyari agütsüba aser posema nungitba ajanga nübortemi state sorkar akhüm metsübur, ta paisa shisem.
India Today-i iba sempet agütsüba ajanga linük dang osang tiyazü sangoktsüogo aser iba asoshi parnok aitsür. Ozüng alema inyakba maparen mazüoktetba sorkar ka nem iba ama sempet agütsütsü malang. Tanü Nagaland nung kümteta aliba state sorkar nem meyiper law & order tiptema meyutetba atema ang sempet agütsütsü langa lir, ta NPCC President-isa metetdaktsü.