Dimapur nung Langpangkong nunger Jubilee among

Hokolbar nü Dimapur Langpangkong Senso Telongjem Golden Jubilee amongba sentong nung Langpangkongtsürtemi Jubilee tayongzükba ken atenba noksa nung angur ( November 23, 2018)

Dimapur, Nov. 23 (TYO) : Dimapur nung Langpangkong Senso Telongjem tenzüker küm 50 ajungba Hon jubilee mong tanü Hokolbar nü Senden Reju nung takok ngua mongogo.
Iba sentong nung jubilee tepela aser shisalemsateptsü jaokertem rongnung Langpangkong nungi adokba yimsüsürtem, PWD minister, Wb.Tongpang Ozüküm; Industries & Commerce Advisor, Wb.Imnatiba Jamir aser MLA Wb.Amenba Yaden nungertemi anir Langpangkong Tzükong Mungdang aser Dimapur district nung tenteta aliba Aor tzükong aser Langpangkong nunger telongjem tentet ajak nungi lenirtem arua shilem agia liasü.
Iba sentong nung jembidang, Langpangkong tzükong ya ali temo aketba alushi aser ayong agi meketbanga aliba tzükong ka lir aser item jagi asenoki rongsen aser temoatsü küma amshitettsüla ta Wb.Tongpang Ozükümi ayongzük. Paisa DLST nükjidong nung aliba ama, ‘telongjem ajanga tejakleni’aniba nükjidongji atalokdaktsür ka küma inyaktettsü asoshi Dimapur nung alir Langpangkong nungertem ajungshia liasü.
Iba kasa sentong nung, Wb.Imanatibai jembidang, Dimapur ya asenok longjemer inyaktsüba tesem tajung ka asünungji, asenoki kati ka dak temulunglemteta longjema alitsübaji kanga tongtibang lir ta metetdaktsü.
Wb.Ameba Yadenia Jubilee mongertem den tajungshi o ka lemsatepdang, “akhidangbo Dimapur ya jenshijenponger jenokdak tesem ka amai jembi saka tanübo tashitemtettertem adenshiba tesem ka kümogo, anungji asen lima tejakleni aotsü atema asenoki len shitak sayutettsüla” ta metetdaktsü.
Iba Jubilee mong nung onük jembir, Wb. Koratemjen, OSD & Additional Secretary (Rtd), Govt. Nagaland-i jembidang, asen lima ya takar küma inyaktettsü asoshi Tsüngremi asen li nung rongsen jenti moaja lir, saka itemji kijai meinyaktettsü, anungji anasa aliba kidanger yimtsüngtem longjemer arok terenlok sentong yanglua telongjem nung inyaktsü nüngdaker ta metetdaktsü.
Iba kasa sentong nung Jubilee nüngo kaket PWD minister, Wb.Tongpang Ozükümi sayaja liasü.
Iba Jubilee mong sentong nung telok balalai ken tajung tena saya tapu balala sayuba ajanga nübortem pelatepa temoatsü ngua mongogo.