Mary Kom, gold medal 6 kokteter mezüngbula kümogo

New Delhi, Yimpoksüi/November 24 (Agencies): Küptoknü New Delhi nung Women’s World Championships 48kg category final asaya koka gold medal trokbuba anguba sülen M C Mary Kom ya Women’s World Championships nung boxer tem rongnungi takok tulutiba ngutetla kümogo. Final asaya nung lai 5-0 agi Ukraine tsür Hanna Okhota madak takok ngua liasü.
48kg category asaya nung arishiküm 35 tain asayar Mary Kom-i la den asayar ayonga ayonga kokogo. Tang tashi nung lai iba asayamung nung gold medal trok aser silver medal ka ta kokteta lir.
Iba gold medal koktetba sülen ‘Magnificent Mary’, tang Cuba nunger nüngtugu boxer Felix Savon den jenjang kasa kümogo.
Lai iba asayamung nung tatemsa 2010 küm Bridgetown, Barbados nung asayaba mapang gold medal kokteta liasü.
Iba World Championships masaya tsüngda Mary Kom aser Ireland tsür Katie Taylor na jenjang kasa nung gold pongungu kokteter liasü.
2001 küm iba asayamung tenzükba mapang Mary-i silver medal angu aser iba sülen 2002, 2005, 2006, 2008 aser 2010 nung gold medal ngua liasü.
Final asaya akokba sülen osngbenertem den sensaksemba mapang Mary Kom-i, “ni iba takok ya kü linük nem bendanga agütsüner,” ta ashi.
“Ni tang tera emotional kümogo. Olympic Games nung 48kg weight category mali. Ajisüaka nenok temeim aser nenoki nungita yariba ajanga ni 2020 Tokyo Olympics atema qualify sütettsü ta bilemer. Küm pezü tejakdang ni Rio Olympic atema qualify mesütet aser iba ajanga ni tang tashi kangshir.”
“Nenok temeim aser teyari asoshi kanga pelar. Ni linük nung gold medal ka koktetba dak alaka nenok nem agütsütsü kecha mali. Tokyo nung gold medal angutsü tasak asütsü kechiyong ni 51kg category nung asayatsüsa akümtsü,” ta lai ashi.
Kasa mapang nung 57kg final nung arishi küm 21 tain Sonia 1-4 agi Germany tsür Ornella Gabriele Wahner-i kokogo.