Linük nung taremzüktep maliba kanga bulua kümdar: Pranab

New Delhi, Yimpoksüi/November 24 (Agencies): Centre nung BJP-i aniba sorkar aitsüba olen ka nung taoba mapang India Tir, Pranab Mukherjee-i, sensotemi sorkartem dang imlaba ama sorkari meinyaker; India nunger democracy kümzüktsü atema sorkari nüburtem tamang koktettsü merangtsüla, ta ashi.
Hokolbar aonung Pranab Mukherjee Foundation aser Centre for Research in Rural Development (CRRID) nati “Towards Peace, Harmony and Happiness: Transition to transformation” omen nung ayongzükba National Conference nung jembidang Mukherjee-i, “Tawa rejutem nung timtem kanga adoker aser item atemaji tasüngdangba akar. Sorkari imlaba ama meinyaker aser rejutem inyakyim-a majung,” ta ashi.
“Tang linüki tensa tamajung ka ajangshidar. ‘Vasudhaiva Kutumbakam’ tangatetba aser tai atokba, taremzüktep aser agizüktetba tangatetbatem linüki mebenshir. Osangtsüsang nung taremzüktep maliba, terasaba aser meimchir temeden anema inyakba osangtem kanga bulur,” ta paisa ashi.
“Sorkar yimsüsübaren aser rejutem inyakyim nung tamang mekatettsüsa lir; itemji linük tanüdangtsü lir, anungji India nunger democracy kümzüktsü atema nüburtem melung tanaben koktettsüa merangsüla,” ta pai ashi.
“Asen linük temzüng nung reju balala shia tashi balala liromedema aguja lir. Ibaji wazüka ayutsüla,” ta pai ashi.
Taoba linük Tir, Pranab Mukherjee-isa, tesüiba küm 70 tsüngda linüki Parliamentary democracy, Independent judiciary aser Election Commission, Comptroller & Auditor General, Central Vigilance Commission aser Central Information Commission ama rejutem kanga junga amenokogo, koba ajanga asen democratic inyakyim nungitter, ta metetdaktsü.