Congress mapatongtem ajanga aluyimertem tim temdaktsür : PM Modi

New Delhi, Yimpoksüi/November 24 (Agencies): Madhya Pradesh Assembly election atema tang Ato kilonser Narendra Modi-i state semdanga lir, aser tanü pai, Congress mapatongtem ajanga linük nung aluyimertem timtemdaktsür, ta aitsü.
“Congress-i tim mesüi inyakba aser parnok mapatong tai ajanga aluyimertem timtemer, ibaji dang masü parnok ajanga ozü sorkara tenüng menük agir. Tanübo parnok mapatong ajanga mapa meinyakba mapang parnoki ayimtener,” ta pai ashi.
Taoba mapang Ato kilonser aser Congress lenir, Indira Gandhi aija Modi-i, Indira indang ‘Garibi Hatao’ yimyim ajanga linük nung sensak tia mesamatsütet, ta ashi.
“Congress-i yazü puraa osang proker. Indira Gandhi-i ‘Garibi Hatao’ yimyim ayimoktsü, saka ibaji ajanga sensak tia samatsüteter asü? Parnoki banks nationalize süja ibaji ajanga sensakertem ajangzüktsü ta ashi, ajisüaka kechi atalok? Nisung aika bank accounts maliasü,” ta pai ashi.
Tanep-a Modi-i, Congress-i telemsa adokdaktsüba politics asayar, ta ashi.
Modi-i, “State nung timtem aika liasü, anungji iba nungjagi asüngsashitsü atema Bharatiya Janata Party-i küm 15 agi. Tangbo mera tulu agia inyaktsü atema maongka lir,” ta ashi.
Paisa Chief Minister, Shivraj Singh Chouhan leniba nung state nung terenlok mapa balala inyaka aruba indang metetdaktsü.
BJP sorkari state nung irrigation facilities agutsü, college aika amenoktsü aser tzü timtem ajak bentettsü, ta paisa metetdaktsü.