Tsüngrem anasai aoba

Asenok ajak arogo nunger, anungji asenok ajak tamanger saka mapang kar nungbo asenok Tsüngrem den talangka pilar ali amato asenoki asenoksasa bilemtsüsa tensa mapang ajurutsüa akok. Asenoki sarasademer saka jangratema sarasadem mesütetter, asenoki sarasademer saka tasü itta mebilemer, anungji teti ratamataba tia nung dang alir ta asüba mapangtem asenoki ajurutsüa akok. Iba ama tia nungji asenok lira, Yakob-i ashir, ibaji asenoki menaba temenen agi asenok Tsüngrem den piladaktsüba tamaitsü asütsü. Tsüngremer temeim, temeshiba aser ochiji kodanga memelenshir saka asenokiang Pa den tesendaktep melenshir. Tsüngremibo asenok teti meimer ser nung asenoki Pai ashi mangai teinyak asüba inyaker, machimajemtsüla chia ajemer aser mekongshitsüla nung kongshir. Mezüng nisung Tsüngrem nungi pilatsüsa mezüng temenen menabajia Tsüngremi techi aser tekongshi ta asüba tashi mangai kongshiba aser achiba ajanga liasü ta asenoki Lipok tapu asem nung angur. Tanüa asenoki kasa tashi manga mapatem inyaker. Ibayongji, Tsüngrem asenok nungi pilar masü saka asenokang Tsüngrem nungi piladoker. Asenoki asen taküm nung temenen kibur kümer alitsüsa inyaker, iba jagi asenok Tsüngrem nungi piladaktsür. Tsüngrem nungi pilar aliba agi asenok mangsa alir ama bilema tangar tsüngdang nümamedangtettsüsa kümadoker. Tsüngremibo moaja lir ser nung kecha maka ama tasü mait akümer. Joko, sarasadema tenüng ka agi sarasademba dak alaka tanüla nung tzüratema sarasadem mesütetter. Laishiba mezüngnüi akümer anungji Tsüngrem o bushiba nung mapang magütsütetter. Iba amaji asen taküm Tsüngrem den pilar tanüla nung takong kümer aliba mapang, Tsüngrem bushia aotsü asoshi Yakob tapu 4 tekong 8 nung ashir, ” Tsüngrem anasai arung aser Pai nenok anasai arutsü, Nenok temenen purtem nenok teka merükang; nenok temulung ana adenba purtem, nenok temulung meshitetang.” Tsüngrem nungi pilar asenok shisabolua aliba mapang, ano Tsüngrem bushia arutsü atema teinyaktsü mapa ana dang lir, kaji asenok teka merüktsüla. Isaia tapu 1: 16 nunga, ” nenok shidokang aser merüka liang,” ta shia angutsü. Tanabuba nung, Tsüngremji temeshi, anungji Pa den alitsü asoshi asenoka temeshi asütsüla aser temeshi akümtsü atema asenok teka dang masü temulungjang merüktettsüla. Adianutem, asenoki asenok teka agi inyakba temenentem aser asen mulungjang nung bilemba shisatsütem indang bilemdangra, asenokia asenoksasa sempatsüsa aser jashitsüsa inyakbatem bilemtettsü. Teka merüktettsü nüngdakba tetezüji asenoki inyakba temenen mapatem ajak Tsüngrem tsüngdang nangzüka meshitettsüla. Atangji, asenoki inyakba ajak temulungjang nungi tama adoker, ajisüaka khenkhen bilemdangdang, temulungjang agi tamajung bilemaka teka mali asübo temenen memenala ta bilemer. Tsüngremi mapa tajung inyaka alitsü asoshi teka tajung moatsü ser nung, asenoki asen teka agi machitsüla bener arua achir, mekongshitsüla nung kongshir aser meinyaktsüla inyaker. Asenoki teka agi auyar aser azü tokshi mapa inyaker. Item jagi asenoki metetsümonga Tsüngrem nungi piladaktsür. Yerimia 71:9 nung ashir, ajak dang nisung mulungjangsa tekülakba. Anungji, aseni asen mulungjang akoktsübaji kanga tenüngdaktsü lir. Asen mulungjang nung bilemba aser aseni inyakba ajakji Tsüngrem dang junger ta asütsüsa asenoki inyaktsübaji Tsüngremi aginür. Tsüngrem anasa aser Pa den alitsübaji asenoki Pai mulungba inyaktsüla. Yisui ashir, asenoki kibur ana tenzüktsü makok, tetezü asenok temulung ana adenba nisung asütsü makok. Asenoki Tsüngrema peladaktsür aser temenena peladaktsür ta alitsübaji tamakoktsü. Asen taküm aser kibong nung shiba kibur südaktsütsü aser koba tenzüktsü, ibaji asenoki shimtettsü asünungji, arung asenokbo Tsüngrem anasai aotsü asoshi asen mulungjang aser asen teka merüktetdi. Idangjiang asenoki Tsüngrem asenok anasai aruba metettsü.