India nung Hindu, Muslim aser Christian tem ajak Lord Ram nungi jakzük

New Delhi, Yimpoksüi (November) 24 (Agencies): Ayodhya nung temple-mosque ken o kakteta Yoga Guru Ramdev-i Honibarnü “Linük nung Hindu, Muslim aser Christian nunger ajak ya Lord Ram nungi jakzükertem lir” ta ashi.
Nübortemi iba ken o atema joko maremzükteter aser Ram temple atema ozüng ka meyanglura, nisungtemi pei sasa tekülem ki yanglutsü aser iba ajanga loktiliba nung timtem bentsür arutsü, ta Ramdev-isa ashi.
“Nisungtemi joko maremzükteter. Ram Mandir atema ozüng ka yangluang mesüra nisungtemi parnok sasa yanglu tenzüktsü. Yamaji inyakra, lokti nung telok balala tsüngda meputep adoktsü. Linük nung Ram anema noktaker mali ta ni amanger, kechiyong Hindu, Muslim aser Christian tem ajak pa nungi jakzükertem lir” ta pai metetdaktsü.
Shiv Sena aser Vishwa Hindu Parishad teloktemi Ayodhya nung Ram temple yanglutsü atema takhangba agütsüshitsü tenzükogo aser telok anapronglai Deobarnü Ayodhya nung sentong balala agitsü ayonga lir.
Osang angazükba agi RSS aser VHP posemer nisung lakh 2 shi den Hindu putirtem Ayodhya nung ‘Dharam Sabha’ sentong nung agitsü atema arua lir. Iba sentong ya Bhaktmal Ashram nung Deobar anepdang 11:00 ako nung agitsü.
Külen, Shiv Sena tanishir Uddhav Thackeray tanü Ayodhya tongogo aser asüngnep VHP-i sentong ayongba jakdang pai Ram Janmbhoomi kimung semdangtsü sentong lir.
Iba atema Ayodhya nung ketdangsertemi security akangshiogo. Ayodhya nung local administration-i yimti telongtet nung CrPC section 144 ozüng alitsü metetdaktsüogo.