NSCW-i tetsürtem dak tashiyim mapa inyakba anentsü ayongzüker

Kohima, Yimpoksüi (November) 24 (TYO): Nagaland State Commission for Women (NSCW)-i tanü tetsürtem anema mapa inyakba anentsü atema Fortnight Observation tenzükogo.
“Tetsür tebur bendanga tashiyim mapa inyakba ya tetsür-tebur kasa ta asüba jenjang atongtsü atema inyakba mapa nung tetsükdaktsü tulu ka lir” ta Social Welfare Department nung Secretary, Sarah R. Ritse-i ashi.
Bayavü Hill nung aliba Commission indang office nung tanü anogo 16 indang sentong tenzükdang Sarah-i iba olen jembi.
India nung tetsürtem lendong nungi jenbua aliba state ji Nagaland ka lir ta züngshir saka asen state nung tetsürtem anema mapa inyakba bulua ataloker, ta laisa ashi.
Sarah-isa Sexual Harassment of Women at Workplace (Prevention, Prohibition and Redressal) Act 2013 ozüng indang temetettsü kar lemsatep.
Department of Social Welfare-i tashiyim mapa agi timtemba tetsürtem yaritsü atema mapa aika tenzükogo. Ministry of Women and Child Development-i teyari agüja Nagaland nung scheme aika tenzüka lir aser iba nung Women Helpline 181, Sakhi – one stop centre, Beti Bachao Beti Padhao programmes dena lir, ta laisa metetdaktsü.
Tetsürtem dak tashiyim mapa inyakba ya odang meyutsütsüla aser bangdak ketdangertem nem osang sangoktsütsüla. Iba tebilemtsü ya tebur aser tetsür, lokti tentet, shisaliok rejutem aser tamangba rejutem- ajaki kasa abentsüla. Iba khuret ya asen loktiliba telungtiba nung tera yanga lir anungji asenok longjemer ibaji atsüteta endoktsüla, ta laisa ayongzük.
Tanü sentong nung NSCW Chairperson Dr Temsula Ao-i “Customary Law and Gender” onük jembidang, “Teburtemi sobaliba ozüngtem yanglushitsüla kechiyong nenoki item ozüngtem am-a lir. Tetsürtem bendanga amshiba item ozüngtem nung lateta lir” ta ashi.
Nagaland nung sobaliba ozüngtem yanglushiba atema tongtipang teinyaktsü ana lir- kaji village council, town committee aser legislative Assembly nung tetsürtem anioktsüla aser tsürabur indang rongsen tetsür aser tetsür tanurtem nem kasa agütsütsüla, ta Dr Temsula-isa metetdaktsü.
NSCW-i ozüng am-a aliba teburtem den olemtep tenzükogo aser kin ajak nung hohotem den olemteptsü tenzükogo. Tsürabur indang rongsen tetsür nem-a kasa lemzüktsütsü atema olemteper aser onoki tokteptsü tangatetba nung masü saka timi olemtepa angatteptsü tangatetba nung iba mapa inyaker, ta laisa shisem.
Kasa mapang tanü Naga teburtem tangatetertem lir aser ozüngtem nung temelenshi bener asütsü mejembidang yongi, Naga tebu aikati pei jala aser kinungtsü nem senmang lemzüktsür, ta Dr. Temsula-isa ashi.
Naga sobaliba asenoki magientettsü kechiyong ibaji asen Naga nunger indang maitsü lir saka iba maitsü telongtet nung Naga tsürtem indang temetentem kümzüka ayutsüla, ta laisa metetdaktsü.
Tanü agiba sentong nung mendenji NSCW Member Kakheli Jakhalu liasü.
Anogo 16 nü End Gender-based violence in the world of Work” indang sentong agidang NSCW-i kin balala nung tetsür hohotem ajanga mapa balala inyaktsü.