Khristan ayak asadangba

Ao limai Yisu Khrista temeim osang tajung arur 2022 küm, küm 150 ajungtsü alinungji, sangküm 2019 küm nungibo iba Sesquicentennial benjong amongtsü asoshi terenemba tenzüktsü ta ABAM ajanga metetdaktsüogo. Atangji, taoba küm 150 tsüngda asenok Aortem Khristan kümer Yisuji dang kibur aser kümtetdakba Tsüngrem ta amanga aruba jenjang asadangra, asenoki mamangtsüsa asenok sobaliba aser libaliro ajak nung temoatsü aser tepela nung aruba asadangtettsü. Tetsübu agi yim ajak atsüdanga yur aluia moutet aliba tia nungi asenok yim o yim na yimjung nung külemi sademsadema alitsüsa akümba tensa tia ajakji Yisu temeim agi asenok nüchi akümba ajanga liasü. Iba nung jagi asenok Yisu dak amanga aruba joko tanübo küm 150 jungdi asür. Atangji, oboula nungi obala aser obala nungi asenok tanü lanurtem tashi taoba küm 150 tsüngda amanga aruba asen tamang aser Khristan ayak asadangtsübaji kanga tongtibanga ta bilemer. Tanü asenok yabo taso dang nungi Khristan kümer asobatem lir, anungji Khristan yimsü amangtsübaji Yisu temeim angatetba agi masü saka tsürabur senmang ama kümer amangba purtema jenti lir. Anungji Yisui ashi ama, kotak yimli nung senmanger akümtsü asoshi tanaben asotsü nüngdakba purtemji asenok tsürabur senmang ama arogo nunger akümba purtem asütsü. Yisu Khrista dak amangba ya alima nung tasoshia lir külenang kotaki aotsü atema amanger, ajisüaka asen tsürabur Khristan asüba aser asenok Khristan akümba agibo kotaki moutettsü. Iba tangatetba nungji tanü asen tamang jenjang mesüra Khristan ayak asadangtsübaji mapang tajung ka asütsü. Asenokiang iba tasadangba mapa inyakdang ochi ashitsüla. Khristan-a ta reprangtettsüsa Khristan purtem dak aketba ayak aika rongnung tongtibang kaji temeim asütsü. Iba temeim yagi asenoki tangar yaritetter asü meyaritetter, tangar dang taidoktetter asü medoktetter, aremzüktetter asü maremzüktetter aser temeim agi samaa aliba tanülatem kümzüktsü asoshi jangrar asü mejangrar ? ta asüba mapatem nung asen dak aketba temeim jenjang asadangtettsü. Tanabuba Khristan ayak tongtibang kaji ochi asütsü. Asenoki amangba Tsüngrem ya temeim aser ochi Tsüngrem lir, anungji temeim o ochi naji Pa sübotsü. Temeim mapa inyaktsü aser ochishia alitsüba ya jembitsübo temela saka inyaktsübo tasak lir. Asenok tamanger tajungtem ta asüba nisungtem aika Tsüngremi moatsüba agi ki tajung nung chiyongtsü tajung chia alir saka asen ki temeket nungbo sensakertem ki talidak maka, chia mechiyong yaseta aliba purtem angutsü. Asenoki temeim indangbo jembir saka asenang meperir asünungji sensakertem asoshi temeim mapa inyaktsübaji mapang madoker. Tatem nung Tsüngremi asenok dang asen akaba senotsü aser kiojen indang masü saka aseni alima nung temeim mapa inyakbatem indangang asüngdangtsü ta amanger. Asenoki asenoksasa tamang nung tasü itta ochishia litettsü amai bilemtsüa akok, saka kodang asenok dangi tatidang arur asenoki ochishia melitetter. Tsüngrem tenzüker aika shi azü azüapongba temenen nungi mepilatetter, arogo nungertem aika rongsen nung tajangzük bushidang aibelenadoker, election arura Yisu temeim indanga mangashidang amai akümer. Item tashimaittem jagi asenok dak Khristan ayak samadaktsür. Ano, Khristan ayak tongtibangbatem rongnung kaji taremzük ya ka asütsü. Taremzük maliba ajanga Khristanbo Khristan ser nung tangar den dang masü saka apuani dena putepa melitetter. Aremzüka ataba aser aremzüka tamajung meinyakba agi Khristan ka tamang indaktsür. Aremzükba agi pei kibong dena kümzüker aser raksatsü melen yanglushir. Atangji, taoba küm 150 tsüngda asenok Aor Khristan nütsüng arenba aser arogo tasen küma aobatemjia asenok ayaksa asütsü, anungji itemjia asadangtsüla. Ajisüaka, item dakji tali, tang asenok tamang aser ayak asadangtsü bilemtetba ya asenok dangi ano Tsüngremer taochi  mapang ka arunür asü ta bilema tangari masü aseni asensasa asen tamang jenjang asadangtsü nüngdaker.