John Abraham-i Mohun Bagan captain shilem agitsü

Yimpoksüi/November 26, 2018 (Agencies): John Abraham-i tawa film tapu balala nung shilem agia arudar aser tang India nunger nüjiso mangu tsüngda 1911 küm football match ka asayaba indang film ka nung shilem agitsü sangdongogo. Parmanu: The Story of Pokhran aser Satyameva Jayate nunger amala film nung shilem agiba sülen pa tang Batla House nung shilem agidar aser film indang poster nung pa DCP ka ama adkokba nguogo. Pai iba project tasenba direct asütsü asoshi Kal Ho Na Ho direct asüsang Nikkhil Advani anisemogo, shibai Batla House direct südaki.
Film yanglur Nikkhil Advani-i ashiba agi, actor-producer John Abraham-i 1911 film direct asütsü asoshi maongka agütsüba ya pa asoshi tetushi ulura, koba ajanga India indang sports history nung tongtibang tatalokba ka indang otsü ashir. Mumbai Mirror sangdong ka ajanga ashiba agi, Advani-i iba film nung John-i captain Shibdas Bhaduri indang shilem agitsü metetdaktsüogo aser football asayateter nüngtugu actor kar anisemtsü.
“1911 küm atalokba indang otsü ashitsü asoshi john-i kü nem maongka agütsüba atema ni kanga pelar. Iba tatalokba ya linük puti otsü nung tongtibang tatalokba ka liasü. Iba film asoshi ataa liang,” ta Advani-i Tentonü tweet asü.
John-i iba project atema Advani indang Emmay Entertainment aser Bhushan Kumar indang T-Series company den longjemogo.
1911 ya John-i jangraba project ka lir, shibai football asaya kanga meimer. Taoba mapang nung pai ashiba agi, iba film ya asür India nunger footballer Sibdas Bhaduri indang otsü lir, shiba lenisüba kübok Mohun Bagan-i 1911 IFA Shield final nung asaya aser East Yorkshire Regiment koka iba tetoktepba akoker mezüngbuba Asian team aküm.
John ya Indian Super League (ISL) Guwahati franchise North East United FC, co-owner lir aser IANS den sensaksemba mapang pai iba film nung football asayar karbo anisemtsü, ta ashi.