Chhattisgarh kübok Sukma nung Maoists 8 khaset; sepai ana asü

Sukma, Yimpoksüi/Nov. 26 (Agencies): Tanü Chhattisgarh nung Sukma district kübok Saklar yimdak security sepaitemi Maoists telungpur 8 khasetogo.
Chhattisgarh Police- District Reserve Guards (DRG) aser CRPF nungi Cobra units 206 aser 208 senpeter telungpur den raradang telungpur 8 khaset aser sepai-a ana süogo.
Sukma SP, Abhishek Meena-i, tang tashi maneni raradar aser Maoists ajakji Communist Party of India (Maoist) nungi People’s Liberation Guerrilla Army züngsemtem liasü, ta ashi.
Yashia state kübok Bijapur district nung sepaitemi Maoists telungpur ana khaseta liasü aser kasa rara nungji sepaia ka yiru.
DRG team aser Special Task Force (STF) senpeter Gangaloor aser Madded areas nung telungpur mita aoba mapang nung telungpur den rara tenzüka liasü. Osangbener den jembidang SP, Mohit Garg-i, DRG aser STF sepaitem senteper Madded kübok Nilamadgu aser Korinjed na tsüngda arem nung telungpur mita aoba mapang nung telungpurtemi tama injang khalokja rara tenzük; minute 40 shi khatepba sülen telungpurtemji jena ao, ta ashi.
“Iba rara nung DRG jawan ka injang agi tekong yirua hospital-i anir ao,” ta Garg-i ashi.
Iba tesem nungji telungpur tasümang ka den .303 rifle ka aser muzzle-loading prangpong ka angu, ta paisa metetdaktsü.
Ano Gangaloor area kübok Borje yim anasa nikongdang 2:30 meta DRG team aser telungpur tsüngda khatep, iba sülen telungpur tasümang ka den rifles ana aser ‘tiffin’ bomb ka angu, ta paisa metetdaktsü.