Meghalaya Governor Roy-i 26/11 osang aibelen

Shillong, Yimpoksüi (November) 26 (Agencies): Meghalaya Governor Tathagata Roy-i taoba mapang ashishitep ken o aika adokdaktsüogo aser tanü pai ano 26/11 Mumbai amakba bilemtetba osang ka lemsatepdang ashishiteptsüsa ka ang metetdaktsü.
2008 küm Pakistan-i yaria Mumbai amakba mapang Muslim nunger ka danga metepset ta Hombarnü Roy-i Twitter nung metetdaktsü saka tatsü lir külen pai sasa bilemba olen ka shia tweet ji agien.
“Paki ajanga teyari agüja Mumbai nung tai maketertem (Muslim nunger maden) tepseter tanü küm 10 buba ajunger, iba dang 26/11 ta ajar. Asenoki Pakis den tesentaktep kechiba meraksa’ar kari danga metet asü?” ta Roy-i tweet asü.
Iba sülen pai kuli tai amer osang lemsatep ta shia tweet-ji agien.
“26/11 nung Paki-i yaria nisung tepesetertemi Muslim nunger dak mekongshi ta asüba osangji ni tai angazük. Shitakba nungbo Muslim nunger aika tepset. Ni kuli tai metetdaktsüogo aser iba atema tatok meshir. Iba tweet ji ni agienogo” ta paisa metetdaktsü.