Ram tekülem ki yanglutsü atema VHP-i senden 547 ayonga amentsü

New Delhi, Yimpoksüi/November 26 (Agencies): Ayodhya nung Ram tekülem ki yanglutsü atema VHP-i Lok Sabha constituency 547 nung senden mena item constituency nung MP tem ajurutsü, aser parnok dang Ram tekülem ki yanglutsü atema ozüng ka benoktsü atema akhangba pusemang ta ashitsü, ta tanü VHP lenir kati metetdaktsü.
Vishwa Hindu Parishad (VHP) International working president, Alok Kumar-i, VHP-i December 6, 2018 tashi nung Lok Sabha constituency ajak nung senden ayonga amentsü, ta metetdaktsü.
Nagpur nung lokti senden ka nung jembidang pai, VHP-i MP tem dang Ram tekülem ki yanglutsü atema ozüng ka akhangba nung pusemang ta mepishitsü, ta metetdaktsü.
Ram Janmabhoomi-Babri Masjid ken o ya mezüng 1950 küm benoka liasü aser tang tashi iba ken o metembangteti lir, ta shia Kumar-i, Supreme Court-i iba ken o angaba district court dang Babri Masjid raksatsüba asalentong yangluba ken oji 2019 küm March ita tashi nungbo bentetang ta tuyua lir, ta metetdaktsü.
Kechiba Supreme Court-i Ram Janmabhoomi-Babri Masjid ken o atema-a kasa tetuyuba magutsü?, ta pai asüngdang.
“Tan ita nungi tenzüka, tanü nungi tenzüka VHP-i Lok Sabha constituency 547 shia nung senden ayonga amentsü aser MP tem ajurua nüburtemi akhangba ama Ram tekülem ki yanglutsü atema ozüng ka benoktsü asoshi pusemang ta ashitsü,” ta Kumar-i ashi.
Tawa BJP MP, Ravindra Kushwaha-i, Ayodhya nung Ram tekülem ki ka yanglutsü atema taruba Parliament nung ozüng ka benoktsü, aser ibaji Rajya Sabha nung magizüktetra Centre-i ozüng ka benoktsü, ta metetdakja liasü.