Hornbill Fest atema osangbenertem senden agi

Kohima, Yimpoksüi/November 26 (TYO): Taruba Hornbill Festival atema November 26, 2018 nü Conference Hall, Tourism Department nung osangbenertem senden ka ayongzüka agiogo, ta ketdangsertem osang ka ajanga metetdaktsü.
Osangbenertem den jembidang Advisor, Tourism & Art & Culture, Khehovi Yepthomi-i iba benjungmong mapang nung parnok den amalitepa yariteptsü ayongzük.
Paisa Kisama nung Hornbill Festival tetenzük sentong agitsü aliba indang metetdaktsüba den külemi osangbenertem dang iba sentong nung shilem agitsü ayongzük.
Commissioner & Secretary, Art & Culture, Ahola Those-i, taruba Hornbill nung state nung tribe ajak nungi sobaliba telok 17-i shilem agitsü, iba nungji tsüngsanger 35 den artist ajak agi 600 asütsü, ta metetdaktsü.
Laisa, artist corner ana Kohima aser Dimapur na nung lapoktsü aser yangji workshops, demonstrations katsüba den painting tetoktepba alitsü aser ayoktsü, iba den külemi takoker nem senpet agutsütsü, ta metetdaktsü.
Laisa, Kisama ji plastic mamshiba tesem ka asütsü aser cold drink stalls mesüra pan dokan malitsü, ta metetdaktsü.
Additional Director, Tourism, Akhale V. Khamo-isa, tang mezüng department-i iba sentong atema Tourist Police tenzükogo, ta metetdaktsü.
Laisa, Kisama nung choral fest aser tetoktepba alitsü, morungs, Christmas nights aser Kohima o Kigwema na nung night Carnival alitsü, ta metetdaktsü.