CM Rio-i Tourist Police tenzüktsü

Kohima, Yimpoksüi (November) 26 (TYO): Chief Minister Neiphiu Rio-i tanü Nagaland Tourist Police tenzüktsüogo. North East nung Arunachal Pradesh sülen Nagaland nung Tourist Police tenzüker asütsü.
Rio-isa Tourist Police garitem aser sayatsü aser Tourist atema Integrated Control Room lapoktsü.
Sentong nung contact numbers den tourist spots, homestay /hotels indang temetettsütem aliba kaket tila ka sayatsü.
December 1 nungi Hornbill Festival amungdang tourist tem kümzüka ayutsü atema tourist police tenzükogo.
Tourist police ya Railway Station Dimapur/ Airport, Chumukedima Check Gate aser Kohima kübok sector 12 nung mapa lemzüktsütsü.
Maneni, Dimapur nung Airport aser Railway Station nung reception counter lapoktsü aser integrated control room ka tentettsü.
Police aser Tourism Department-i linük aser bendanglen nungi aruba nisungtem kümzüka ayutsü atema mapa tajung inyakba atema tenüngsang agütsür ta tanü Chief Minister Rio-i ashi.
Mapang talangka Naga nunger ya mangko alepertem ta aser ano telungpur khuret aliba ajanga Disturbed Area Act benoka tenüng tamajung ngua aru. Yimten tebilemtsü ano melatet ajanga AFSPA tang tashi benoka lir aser iba ajanga state mezüng semdangi arurtem tsübur, ta Rio-i ashi.
Naga yimten teloktemi India sorkar den ceasefire alitsü nangzüktepba aser yimjung olemtep agiba ajanga state nung yimjung aruogo. Taoba mapang India sorkari Prohibited Area Permit benoka liasü saka tang ibaji Protected Area Permit ta melenogo aser iba ajanga Nagaland tensa tajungba akümba sayur, ta paisa shisem.
Police, security forces, civil societies aser sorkar department tem yaritepba ajanga Nagaland nung law & order tensa tajungba kümogo aser India sorkari ibaji ajiteta state tilatem telemsa nung Nagaland nem Best Law and Order sempet agütsü, ta Chief Minister-isa metetdaktsü.
Sentong nung Deputy Chief Minister, Y Patton-i o jembidang Nagaland ya tourist temi sapua semdangba tesem ka akümtsü asoshi lenmang aika sadema lir ta ashi.
Tourist Police force lapokba ajanga Tourist tem kümzüka ayuba dang masü saka tourist temi Nagaland semdangtsü jangradaktsütsü ta Patton-isa shisem.
Tourism and Art & Culture Advisor, Khehovi Yepthomi-ia ashiba agi, tourist tem kümzüka ayutsübaji kanga tongtipang.
Tanü anogo ya Department of Tourism atema dang masü saka Nagaland state atema tongtipang anogo ka lir aser Nagaland nung Tourist Police tenzükba ajanga temelenshi angutsü, ta paisa shisem.
Sentong nung mendenji ADGP R P Kikon liasü, Police Baptist Church Pastor Vesotsu Rhakho-i temoatsü meshia sarasadem aser DGP Nagaland T John Longkumer, Additional Director (HoD) Tourism Department, Akhale Vizol o IGP (Range) Sonia Singh nungertemia o tatsütsü jembi.