Deputy CM-i Chief Secretary amokmerenba aitsür: NPF

Dimapur, Yimpoksüi (November) 26 (TYO): Nagaland Deputy Chief Minister and in-charge of Home Y Patton aser Chief Secretary, R. Benchilo Thong (IAS) na tsüngda Additional Director General of Police (DGP), Rupin Sharma mapa belentsü dak sendakba nung Y Patton-i R Thong amokmerenba atema aoksar ta Naga People’s Front (NPF)-i metetdaktsü.
ADGP, Rupin Sharma ya ita ana shi tejaklen DGP mapa nungi anenja liasü aser pai Nagaland House, New Delhi nung deputation asütsü atema asüngdanger. Iba mapa teinyakdak nung Deputy CM-i Chief Secretary amokmerena merenshi, ta NPF-isa ashi.
Rupin Sharma-i Nagaland House nung inyaktsüsa New Delhi nung mapa lemzüktsütsü asüngdanger. Pa medical check-up asüba den külemi deputation inyaktsü atema pai asüngdanger, saka Home Commissioner-i medical leave agütsütsü atema file ka benok aser ibaji ajanga Nagaland Chief Minister Neiphiu Rio dangi iba onük abentsüsa aküm. Rupin-i Nagaland House nung mapa lemzükjang ta asüngdangbaji Chief Minister-i agizük aser CMO-i Home Commissioner nem tetuyubatem agütsü.
Ajisüaka, iba onük atema Deputy CM-i pa Mizoram nungi meyipa arur Chief Secretary tembangtsütsü ta amokmerenba osang angashia kanga aoksar. Iba tatalokba ajanga NPF-i Naga nunger ajak dang “asenoki kobika asen yimtenren lennirtemi yimya tamajung benshiba aremzüktsü?” ta asüngdanger. Asen state nung tongti ketdangsertem yamai amokmerena aser yimdong nung tamagitsü ama benshira, tilartemi item ama yimsüsürtem ket nungi kechi tia ajurutsü ta asüngdanger, ta Press Bureau sangdong ka nung ashi.
Chief Secretary ya tang Chief Minister aser Deputy Chief Minister na yongtsü nung timtemer ama bilemer saka iba onük atema PDA Chief Minister-i ola madokba atema NPF süngmanger. Pai ola adoktsüla kechiyong sorkar ketdangsertem yamai yimsüsürtem ket nung tim metemdaktsütsüla, ta parnokisa shisem.
PDA sorkar ashishitep ken o ka khen ka ta adoker aser iba ajanga parnok sasep nung tip matemba aser obang meputepba sayur. Sorkari ozüng mezüngmeshi masütsüla saka tangsa tang ozüng amer mapa inyaktsüla, ta NPF-isa metetdaktsü.