Tsüklu ayimtsüla

Alima nung nisungtem asoshi teinyaktsü tongtibangtiba kaji tebok asüngtsüba ya lir, kechiyong tebok tama asüng nung dang mapa inyaktettsü. Ibayongji alima tesem balala nung nisungtemi pei chia ajemba sobaliba dak apet alu tapu balala ayimer. Alima tesem kar nungbo wheat lu dang ayimer, kar nungbo alo lu ayimer aser kar nungbo tsük lu ayimer. Asenoka tsük lu ayimertem rongnungji dena lir, iba jagi tsük agi jang kümer chi sorua chiyonga alibaji asenok sobaliba kümogo. Chi chiyongba kin asünungji asenoki tebok asüngtsü asoshi chi melena whreat agi yangluba amtsük aser alo agi yangluba chiyongtsütem mechinür. Iba jagi chiyongtsü tapu balala aika achiyonga chi mechiyongra tebok masümger ta asenoki jembir. Aji shitak lir, kechiyong asenok ya chi bok lir, anungji roti aser alo agi yangluba chiyongtsütem agi jangramatemtsü. Atangji, aluyimtsüba mapa ya tasak aser ano külen asenok ama tekong lu ayimertem asoshibo tsük lubo mayimang tajungba, kechiyong inyakba yari tsük marur. Ibayongji, tanübo aikati tekong nung tsük lu ayimba mapa toktsüogo. Ajisüaka, ano asen lima nung tzülu ayimtsüsa tesem aika malinungji, nisung aika alua mayimer aser tanga mapa nunga junga meinyaker ta kazüa dang aliba nübo aika kümogo. Atangji, asenok aikati ponglashi lu yima ak metsür, iba jagi tajangzük tajung agütsür. Ajisüaka, asenoki ponglashi agi chiyongtsü tajung kümdaktsür chi melen achitsüsabo meinyaktetter. Tanübo asenok tia junga asenoki tsük lu meyimtetaka chi chiyongbo matitsüsa India government nungi Relief jang sen dalang agi angur. Ibayongji, asenoki alu ayimtsü to kenyongi tebilema mebilemi amadok südi. Joko, tanü asüng tanurtemibo tsükji komalar mangu aser memetet kümogo. Parnoki alu nung jang ya terenem meyiteta aliba bendena bener adoker ta bilemer. Yimtsüng kar nungbo pakti nung tsük pudaka aliba ngur tanurtemi ya kechi ta süngmanga asüngdangba tashi atalokba otsü lir. Tanü asenok loktliba nung nübortem tiaji meteta dang yamaji kümdagi. Nisung ajak tazünger tashitemetetter dang, ita sen tululu achir aser business inyakertema takar dang akümer. Ajisüaka, tulur aser takar ajak chibo chi chiyonga taküm alitsü. Asenok ita petinu tonga tua alitsüa akok saka yangjia asenokbo chibo chisa chiyongtsü. Iba tangatetbaji asenok ajak mulung nung kanga süoki ia bilemtsüla aser kechisüdirsüaka asen lima nung chi manguba ayawarabosa marudaktsütsüsa meranga inyaktsüla. Iba tangatetba aser shisabolu aliba agi, taoba hopta nung ” Tanurtemi aluyimbaren angazüktsü asoshi kibong shia tsüklu tilala ayim nunga koma süla ?” ta asüba nung asenok shisalemsatepogo. Atangji, tanü nisung aikati süngo lu, rubber lu aser süngjang lu ayimer. Ibaji kanga junger, meranga yimer item rongsentem jagi asen lima nemsa tajangzük agütsütsü. Ajisüaka, item jagi sen kümer jang alia tebok asüngtsüba dak alaka itemjibo tebok asüngtsü asoshi chiajemba chiyongtsü kabo masü. Atangji, asenok alima nung aliba ya chiyongtsü atema alir masü saka taküm alitsü atema chiyonger. Ibaji meteta asenoki chiyongtsü züsentetba maparen nung kanga temulung agütsütsüla. Tanga nüngdaktem nungbo asenok ya tangar dak nendaka aliyonga kecha masü saka asenok taküm alitsüba atema chiyongtsü asoshibo tangar dak nendaka malitsüla. Tanü putu nung ajaki zülutsü aser azüngtsü meteta ama, nisung ajaki tsüklu ayimtsü aser tsük agi jang kümer soruchioka chiyongtettsüla. Iba ama sobaliba nung putu dak apet hadir aser machine amshia inyaktsüsa, tsüraburtemi pei tanurtem sayutettsüla aser school nunga aluyimtsüba maparen nung tali temulung agüja sayutsüla. Ita petinui atur mali agibo kin ka taküm litettsü saka aluyimer malibo melitettsü.