UP nung police matsüngdang nisung ka tepset

Lucknow, Yimpoksüi/November 27 (Agencies): Kanga dang taoksatsü tatalokba ka nung Uttar Pradesh kübok Shamli district nung nisung telok kati police tem matsüngdang nisung ka tepset.
Iba tatalokba ya camera nung tangokogo aser iba ajanga chief minister Yogi Adityanath-i state nung temzüng ozüng tsütsü temelenshi bener aruogo ta ashiba jungkai adoka sayuogo.
Video nung nisungba ya police temi longbanger aliba mapang nung lokti kati police gari telung azükba nguogo. Iba sülen pa gari nung atsüzük aser maneni taochi makai azük.
Iba tatalokba ya Hathchoya yimtsüng nung atalok aser asüsang ya Tarashpal ta jangjaogo. Asüsang ya yi jemer local nisung kar den rara mena. Parnoki Tarashpal dak azük tenzük aser iba osang ya UP police nema agüja liasü.
Police tem iba tesemi arua Tarashpal gari telung nung inokaka lokti-i pa dak maneni azük aser pa tepset. Iba sülen Tarashpal’er kinungertemi aibelena alirtem aputsü asoshi khanga longkak aita nokdak.
Iba tatalokba ajanga state nüburtem tekümzükba tsütsü tebilemtsü akar. “Yogi Adityanath-i anir sorkar kümtetba sülen nungi Uttar Pradesh nung temzüng ozüng tsütsü mepetmesü adoka arudar. Ajisüaka chief minister-a dena nisung tepsetba ken o nung aija lir anungji tangatet dang. BJP sorkari temzüng ozüng tsütsü temelenshi bener arutsü asoshi ita 6 meshi saka ita 19 sülen tensa tamajungba küma odar. Onokibo CM Yogi dang mapa toktsür temple-i meyipa aotsü ajungshir,” ta UP Congress otongdar Anshu Awasthi-i ashi.
UP nung temzüng ozüng ya ‘jungle raj’ ta jaa Samajwadi Party otongdar Anurag Bhadaurai-i ashiba agi, “BJP-i sorkar kümtetba sülen nungi state ya are mama kümogo. Tepuokdak alirtem nem yi aser injang agütsür aser nisungtem police matsüngdang tepseter. Iba tesem indang SP mapa nungi tangsa tang anentsütsüla.”
Shamli, SP, Ajay Kumar-i ashiba agi, iba tatalokba tesem nung alib police tem ajak mapa nungi anentsüogo. “Osang ajanga, nisungba ya police matsüngdang asü ta shiogo, saka aji tiyazü lir,” ta pai ashi.