US Missionary Chau mang bushiba anentsüla: Survival International

Port Blair/New Delhi, Yimpoksüi (November) 26 (Agencies): North Sentinel nung lisopurtemi American missionary ka tepsetba mang bushiteper saka human rights telok kati police dang mang bushiba mapa anentsü atema mepishia metetdaktsü.
Arishi küm 26 tain John Allen Chau-i taoba hopta North Sentinel semdanga idakji aliba lisopurtem Khristan yimsü agizükdaktsütsü atema ao saka pa tepset.
India police-i Chau indang mang bushitsü atema anthropologists aser psychologists den yaritepa mapa inyaker, ta ketdangser kati ashi.
Ajisüaka, Survival International-i ashiba agi pa mang bushibaji India ketdangsertem aser Sentinel nunger atema lendong keta lir.
“Yimra, measles mesüra tanga tashidak kar parnoki (Sentinelese) menara, par kin samatsü akok” ta Survival International-i ashir.
Sentinelese nunger ya alima nung pre-Neolithic tribe tatembangba ta züngshir. Parnoki bendanger den tongtepratep mesüi dang arur aser asütsü memeranger. India sorkari küm aika parnok kümzüka ayutsü atema parnok aliba asetkongi nisungtem meyoki noktanger.
“Onoki anthropologists aser psychologists den osang agitepdar” ta Andaman and Nicobar islands nung director general of police Dependra Pathak-i ashi.
Chau mang bushiba maparen ajanga tensa tamajungba akümtsü aser nisung takümtem lalutsü ta anthropologists, journalists aser activists telok katia metetdaktsüogo.
“Sentinelese nunger temetentem aser taginübatem akhümtsübutsüla. Tensa meraksatsüla” ta parnokisa ashi.
Chau-i social media nung paji adventurer aser explorer ka ta ashi aser pai November 15 nü rong tila ka ajanga asetkongi aiben oli aruli ta senzü.
Andaman aser Nicobar ketdangsertemi Hombarnü sangdong ka nung iba asetkongi India nunger densema nisung shinga aotsü memelar ta metetdaktsüogo.