Mkg dist kübok social audit asembenren takok ngua agiogo

Mokokchung, Nov 27 (TYO): Mahatma Gandhi National Rural Employment Guarantee Act (MGNREGA) kübok society for training and research on rural development Social Audit Public hearing (2014-15) asembubaren Mokokchung district atema Nov 26 nü Hotel Metsüben Mokokchung nung takok ngua agiogo.
Tanü social audit agibaji Mokokchung district kübok block 6 – Tsürangkong, Longchem, Mangkolemba, Ongpangkong (N), Ongpangkong (S), Kubolong nungi yim 7 – Moayimti, Lakhuni, Japu, Chungliyimsen, Kinunger, Moalenden aser Mopungchuket yimtem liasü.
Iba sentong nung Observer, Mokokchung SDO (Civil), M. Chaitanya Prasad IAS-i jembidang, yimdak nungdakbatem indang sorkar dang ashitsüla aser yim tejakleni aotsü nükla yur mapatong balala inyaktsü asoshi ajungshia liasü.
Job card alir ajak bank account lapokdakja sentaktepba mapa inyakdaktsünür, ta paisa yimdak yimsüsür aser lenirtem dang khuret süa inyaktsü o ka ashi.
Yim tobur ajungba mapatem, süngdonglidong atemba, tanur aser lanurtem asayadak moaputem aser yimer ajangzüktsü asoshi terenlok mapa balala nung temulung agütsütsü asoshi paisa teinyaktsü kar lemsatep.
Yim ka ajungkettsü aser renloktsü atema sorkari mapa balala inyaktsü senotsü agütsür, anungji, koba mapa inyakdir inyakaka, ajaki ochi shia inyaktsü asoshi paisa tayongzükba ka agütsü.
Mapang shia job card-tem update asütsü nungdaker aser leni maor/lemtamatartem nem job card yanglutsütsü asoshi paisa inyakdaktsünüba o ka ashi.
State Resource Person (SRP), Moalongi mapang tatsüka agidang, social audit public hearing sentong ya tongtibangsa MGNREGA kübok sorkari mapatong balala inyaktsü atema yokba senotsütem ochi shia amshir asü mamshir ta tsüngdong oa reprangba mapa ka lir, ta metetdaktsü. Paisa tarutsü nung timtem majurutsü atema koba mapa inyakdir inyakaka item indangji record shitak ayutsü shia liasü.
Social Audit Unit Nagaland ajanga yim kar nung Job Card update junga masüba dak alaka tanga maparen kecha nunga tebilemtsü ken o bener maru nungji, lokti bangzüng kecha renema mayu.
Tanü iba sentong nung District Program Coordinator & Project Director (DRDA, Mokokchung), Liboni Humtsue menden liasü. Social Audit Unit Nagaland nungi ketdangsürtemi yim 7 nung MGNREGA kübok senotsü aruba nungi mapa balala inyakba indang osang tatongi bener arua telok den lemsatep.