Kaur aser Smriti na WBBL nung asayatsü

New Delhi, Yimpoksüi/November 27 (Agencies): India T20I captain Harmanpreet Kaur aser Smriti Mandhana na Women’s Big Bash League (WBBL) season pezübuba nung shilem agitsü. WBBL nung Harmanpreet maneni Sydney Thunder nungi asayatsü aser India T20 vice-captain Smriti Mandhana Hobart Hurricanes nungi asayatsü tenangzüktepba yangluogo. Tena taoba mapang nung Brisbane Heat nungi asayaa liasü.
Tanabuba season nung Harmanpreet-i Thunder pur atema run timtiba yanglua liasü. Lai asaya 12 nung run 296 yanglu aser Thunder pur Player of the Tournament shim.
Blundstone Arena nung 2016 küm Australia den asayaba mapang mezüngbuba ODI century yangluba sülen Smriti-i ashiba agi, team tasenba nungi la sempet sayutsü yongyaa atar. “Ni asayar aika nungi Hurricanes group ya kanga dang squad tajung ka ta angazükogo aser ni Tasmania-i oa asayatsü matateter,” ta laia ashi.
Hurricanes’ coach Salliann Briggs-i ashiba agi, pa par squad tatembangbuba asayar dak kanga temulung asür. “Mandhana-i world stage nung shilem tajung agiba nguogo aser taoba hopta ang lai Australia team den asayaba nguogo. Ni la purple jersey semer asayaba reprangtsü matateter, la ya onok asoshi dang masü saka asayamung ajak atema jangratemtsü ka asütsü,” ta pai ashi.