Smith, Warner Bangladesh T20 league nung asayatsü

Yimpoksüi/November 28, 2018 (Agencies): National team nungi asayatsü asoshi nokdanger aliba mapang ka nung taoba Australia captain Steve Smith Bangladesh Premier League nung asayatsüba osang Comilla Victorians puri Sangtennü sangdongogo. AFP den sensaksemba mapang Victorians puri taruba T20 league nung Smith parnok nungi asayatsüba osang jangjatsüogo. Victorians coach Mohammad Salahuddin-i ashiba agi, “pa Dhaka phase nung mezüngbuba asaya pezü nung shilem magitettsü saka Sylhet nung asayaba mapang nungi shilem agitsü.
“Pa aruba sülen team tajungba akümtsü. Ni team nung asayar tejen nüngdaker. Onoki asaya angatetba aser azüoktetba asayar nüngdaker,” ta pai ashi.
Maneni Salahuddin-i, taoba Pakistan allrounder Shoaib Malik iba asyamung tembanga shilem magitettsü ta ashi. “Shoaib Malik iba asayamung tembanga masayatettsü. Pa mezüngbuba round nung asayatsü aser iba sülen Steve arutsü,” ta pai ashi.
Taküm küm Metsüremi/March nung ball tamper asüba ken o nung aija ita 12 asaya nungi nokdangba sülen Smith, Canada Global T20 aser Caribbean Premier League nung asayaogo aser tang agi asayamung tasembuba nung shilem agitsü jangjaogo. Pa maneni Pakistan Super League nunga asayatsü koba Tsüklai/Feb aser Metsüremi/March nung asayatsü
Osang ajanga ashiba agi, taoba Australia vice-captain David Warner-a iba asayamung nung Sylhet Sixers nungi asayatsü. Iba asayamung ya Aenjeti/Jan 5 nungi Tsüklai/Feb 8 tashi asayatsü.