Olympics Gold angutsüji kü pungmang lir: Mary Kom

New Delhi, Yimpoksüi/November 28 (Agencies): World title trokbuba anguba sülen India tsür rongnungi nüngtugu boxer M C Mary Kom-i Rasemnü ashiba agi, lai Oympic nung gold medal ka angutsü asoshi nükjidong lir.
Arishi küm 36 asayar-i world championship nung tawa gold medal trokbüba koktetogo aser iba ajanga la iba asayamung otsü nung boxer tem rongnungi takok tajungtiba angula kümogo.
“Ni Olympic nung 2012 küm bronze medal kabo koktetogo, saka gold medal angutsü ya kü pungmang lir. Ni world championship nung takok tajung anguba atema kanga pelar aser iba ajanga taküm nung tejakleni aotsü asoshi kü sasa dak tali temulung talemba kümdaktsüogo,” ta lai athletics event ka nung ashi.
“Ni Tokyo Olympics nung gold medal angutsü rangloker lir. Ni kü linük asoshi gold medal ka bener arutsütsü asoshi anasü-asemsü agi temerangba inyaktsü,” ta laisa ashi.
Mary Kom-i 48kg category nung world title koktetogo, saka Olympics nungbo la 51kg division nung asayatsü.
Union Minister for Women and Child Development Maneka Gandhi, shiba JLN Stadium nung iba sentong nung dena liasü, lai Mary Kom ya “national treasure” ka lir ta ashi.
“Lai world titles trok kokogo aser lai anir asaya ajak nung asayer yimya tajungtiba benshia asayatsü asoshi tanurtem tenangzüktepba ka agiba atema asenok ajak kanga pelar,” ta Gandhi-i ashi.
Osangbenertem den sensaksemba mapang Mary Kom-i ashiba agi, yimya shidak nung training shidak agiba ajanga la mapang ajak nung asayatsü renema alir.
“Ni training agiba mapang kanga temulung agüja inyaker. Ni session 2-3 lira ni item ajak nung adentsü meranger. Ni training magira takok mangutsü,” ta lai ashi.
Olympic dak rangloker la training agiba yimya melenshitsü memelenshitsü ta asüngdangba mapang lai, la indang coach aser Boxing Federation of India (BFI) den asüngdangtepa sentong ka yanglutsü, ta ashi.
“Ni kü coach, BFI aser SAI (Sports Authority of India) den jembishinütsü. Tang facility tajungba kümogo aser result tajungba angutsü imlaa atar,” ta laisa ashi.