Kohima nung lenmang anasa aliba osettsüset agientsütsü

Kohima, Yimpoksüi/Nov 28 (TYO): November 28 nungi Kohima jila aser telongtet nung District Administration, Police, KMC, PHED aser Power Dept. senteper lenmang anasa aliba osettsüset balala agientsütsü atema Kohima DC, Rajesh Soundararajan, IAS-i tutuyuba agutsüogo, ta ketdangsertem osang ka ajanga metetdaktsü.
Iba maparen inyakba mapang nung Kohima aser jila telongtet nung lenmang anasa yua aliba kisü-jensüba osettsüset, süng, ak ki, metsümeshidak, mamshiba gari, optical fiber cables/wires, tzü pipes aser temdangsüngba osettsüset aputsü aser garitem atsüer aotsü. Gari atsüer aoba taa ji kiburi agutsütsü aser apuba osettsüset ajakji kiburi alizüktsü.
DC-isa jila aser Dimapur-Kohima highway nung Khuzama tashi nung aliba commercial kiojen aser dokan kiburtem dang rong ateptsü aser light bulb ayutsü metetdaktsü.
Ketdangsertemi aiben lepshia tetuyuba agüjaka companies/contractors/sub-contractors/residents kari tashi mangaba ajanga item tetuyuba agutsür, ta kasa osang ajanga metetdaktsü.